Sermersuarmi qillerivik nuuttussanngorpoq
Qillerivimmi NEEM-imi qillereqataasoq Københavnip Universitetianeersoq, Jørgen Peder Steffensen, aviisimut Jyllands Postenimut ullumi taama oqaaseqarpoq.
- NEEM-imi qillerinitsinni paaserusutavut tamakkiisumik paasinngilavut. Taamaattumik nutaamik qillererusuppugut, taamaalilluta sermersuaqarnerani akullermi, ukiut 115.000-it 130.000-illu missaasa matuma siornagut susoqarsimanersoq, iluamik paasiniassagatsigu. Silap pissusaa angisuumik allanngoriataarsimanersoq paasisaqarfigissallugu, annerusumik soqutigaarput, soorlumi tamanna ilimagigipput. Tamanna ilumoorsimassappat, ukiumi 2100-mi silap pissusaa Eem-ip nalaanisut ittoq atulissavarput. Taamaattumik tamanna paasisaqarfigissallugu pingaaruteqarpoq, Jørgen Peder Steffensen oqarpoq.
Ilisimatuut tassa aningaasaliisussarsiorniarput, sermersuarmi allamut nuullutik qillereqqissinnaaniassagamik, matumanilu naatsorsuutigaat atortutik illuutillu, 2007-imiit nunanit assigiinngitsunit 14-init atorneqartut atoqqissinnaassallugit.
Jørgen Peder Steffensenip oqaatigaa, nutaamik qillerinissap 2014-imi piviusunngortinneqarnissaa anguniarneqarusuttoq. Ilisimatusarnermut ministerip Charlotte Sahl-Madsenip qillerivik NEEM aasaq tikeraarpaa, pilersaarutigineqartullu tapersersorlugit.
- Ilisimatuut NEEM-imi paasisatik, maanna ukiuni arlalialunni allaaseralugillu saqqummiutissavaat. Tamatumali kingorna nutaamik qillerinissaminnut aningaasassarsiussapput. Tamannalu neriunaateqarpoq, tamaanimi ilisimatusarneq qaffasissumik inissisimammat, ilisimatusarnermut ministeri Jyllands-Postenimut oqarpoq.