Sermersuarmi qillerineq allamut nuulerpaat

Ilisimatuut nunatta sermersuani kilometererpassuarnik itissusilimmut qillerillutik sermersuarmit ilanngarsiniarput. Ilisimatuut sermersuup qanoq aalajaatsiginera paasisaqarfigerusuppaat. Tamanna Issittup Ukiuinut, ukiormanna marsip aallaqqaataani aallartittussanut atatillugu ingerlanneqassaaq.

Sermersuarmi qillerinikkut ilanngarneqartartoq tassaanerarsinnaavarput ukiut hunnoruju tuusintilikkaat ingerlaneranni silaannaap pissusaata aamma kiassutsip ississutsillu qanoq issimanerannik toqqorsivik qerisoq.

- Sermersuarmi qillerinikkut ukiut ingerlanerini silaannaap qanoq allanngorartigisimanera paasisaqarfigisinnaavarput, tamannami ullumikkut paasisaqarfigissallugu pisariaqartinneqarmat. Matumani siunertaavoq sermersuup ilaanik sermersuaqarnerata akulliup nalaaneersumik pissarsinissaq, sermersuarlu tamanna nunatta sermersuata naqqata tungaani 400 meterisut itissusilimmiippoq, misissuinermi pisortaq Dorthe Dahl-Jensen ullumi tusagassiortunik katersortitsinermi taama oqarpoq.

Qillerineq ukiuni arlalinni ingerlanneqassaaq, tamatumunnga patsisaavoq qillerineq taamaallaat maajimit aggustimut ingerlanneqarsinnaammat. 2007-imi aasakkut siornatigut qilleriffiusimasumit atortut qilleriffissamut nutaamut nutserneqassapput, tassami qilleriffissaq nutaaq allorniusat sanimukartut avannamut 77,5 gradianni inissisimassammat.

Issittup Ukiuinut atatillugu inuit 50.000-it missaat issittumukaassasut ilimagineqarpoq, taakkua ilarpassui tassaassallutik ilisimatuut.