Sermersuarmi ajornartoortut tarrarsuuteerannguup ikiorpai

Tarrarsuutinnguaq, soorlu kiinnakkut tanitsilluni atortagaq, Sermersuarmi pisuttuartilluni immaqa atorfissaqarpallaanngikkaluarpoq, tuluilli qaqqasiortartut tallimat taamaattumik tarrarsuutinnguaqaramik qujassutigeqaat, tarrarsuutinnguarmi taamaattoq pissutigigunarlugu inuunertik annaappaat.
Allattoq Carla Davidsen
aggustip 03-at 2011 16:07

Tuluit taakku tallimat sermersuarmi Mestersvigip eqqaaniittumi majuartillutik sila kiatserujussuarmat, taamaalillunilu sermeq aalluni, tupeqarfimminnut ingerlariaqqissinnaajunnaarsimapput.

Oqarasuaataat qaammataasakkoortartoq ilutigalugu aamma aserorpoq, nerisassaallu nungulluinnalerlutik.

Qulimiguullip nalaatsornerinnarmik tassanngaannaq avaqqummatik tarrarsuuteerartik, Kalaallit Nunaannukalerlutik timmisartoqarfimmi pisiartik, iluaqutigileriataarpaat.

Tarrarsuutip seqinermit akisunnera iluaqutsiullugu, qoorortuumillu arlaleriarlutik igittareersut, qulimiguulimmik mikisunnguamik ingerlatsisunit takuneqariataarput. Uninngaffiisa qanittuannut taanna mippoq, ilisimasassarsiortullu taakku tallimat tupeqarfiannut nalunaaquttap-akunnera ataaseq atorlugu oqquppaat.

Tuluit tallimat taakku tamarmik ajoratik Tuluit Nunaannut uteqqereerput.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq