Sermersuarmi aatsaat taama ititigisumi qilleripput

Nunatta sermersuani NEEM-imi taaguutilimmi qillerisut nutaamik angusaqarput. Qillerutit nutaat atorlugit 1758 meterimik ititigisumut qilleripput, taamalu ititigisumut siornatigut qillersisoqarsimanngilaq.
aggustip 27-at 2009 10:50

Qillerinermi qangarsuaq nunarsuup ilarujussuata sermersuarmik qallersimaneqarnerata nalaa anguaat, sermimik qillereqataasoq Dorthe Dahl Jensen oqaluttuarpoq.

Sermeq qillerinitsinni qaqitarput takusinnaasara malillugu ukiunik 38.500-inik pisoqaassuseqarpoq, Dorhte Dahl Jensen oqaluttuarpoq nangillunilu: Tassa taamanersuaq sermersuaqarnerata nalaani silaannaap allanngorluinnarnerata nalaaneersuuvoq. Sermersuaqarnerata nalaani silaannaap allanngorsimanera misissuilluarnitsigut paasisaqarfiginissaa pissanganaqaaq.

Qillerivipput NEEM qilleriviusartuniit kippasinnerusumiippoq sermillu sinaanut qaninnerulluni. Kalaallit Nunaata sermersuata Canadap avannaaniittut qeqertat sermianut attuumassuteqarsimanersoq imaluunniit sermit immikkoorluinnartuusimanersut tassunga tunngatillugu paaserusutatta ilagaat.

Qillerinitsinni qaqitatta angerlaallugit uuttortaaviginerisigut sermersuaqarnerata nalaani silaannaap allanngorsimanera tunngavigalugu sermeq ataasiinnaasimanersoq immikkoortuunersulluunniit paasisaqarfigisinnaavarput, Dorthe Dahl Jensen oqarpoq.

Ilisimatusartut aappaagu suli itinerusoq, tassalu piffissaq suli siusinnerusoq, angusussaavaat. Qillerinikkut piffissaq ukiut 115.000-it matuma siorna anguniarneqarpoq. Taamanikkut silaannaq kiattorujussuuvoq Kalaallit Nunaannilu ullumikkornit 5 grademik kiannerulluni. Siunissami silaannaq kiannerulissappat qanoq pisoqarumaarneranik paasissutissanik tamakku aallerfiusinnaapput.

Kiannerugallarmat silaannaq qanoq issimanersoq paaserusutatta ilagaat, Dorthe Dahl Jensen oqarpoq. Silaannarmi naqitsineqarfiit qanoq issimanerat, sermip qanoq portutigisimanera kiisalu immap qanoq qaffasitsigisimanera paasiniagassaraarput. Paasissutissat taamaattut silaannaap allanngorluni atugassarititaanut paasissutissanik aallerfigissavarput.

Ukiut 100-innaat qaangiuppata nunarsuarmi sila gradinik marlussunnik kiannerulertussaasoq naatsorsuutigineqarpoq, taamaasippallu maani avannarpasinnerusumi gradinik sisamanik-tallimanik kiannerusussaavoq. Tassalu silap kiassusaa qillerinitsigut angusassatsitut issimassaaq. Tassalu qillerinermi paasisatta tamakku silap pissusaanik paasisaqarnerutissinnaavaatigut, Dorthe Dahl Jensen naggasiivoq.

Qillerivik NEEM nunat assigiinngitsut 14-it suleqatigiillutik suliffigaat ilisimatusartullu 100-it sinneqartut aasap ingerlanerani tassani suleqataapput.

Kim Brejnholtip ilanngutassiaa Aqqalu Olsvigimit kalaallisuunngortinneqarluni atuarneqarpoq.