Sermersuaq qaqqorikkunnaarpoq
Ukiorpaalunnguit matuma siornatigut seqernup qinngornerisa affaat sinnerlugit avataarsuanut utersaaqqittarput. Taamaannerata sermersuaq aalaakkaatissimavaa, tassalu aakkiartunnginnerulluni. Danmarkimi tv-qarfik TV2.dk taamatut allaaserisaqarpoq.
NASA-p satellitsiisa marluk, tassa Aquap aamma Terrap assiliillutik misissuinerisigut sermersuup allanngoriartornera paasineqarsimasoq, atuagassiami Climate Watch Magazinemi allaaserineqarpoq.
Ukiut qulit kingulliit ingerlaneranni sermersuarmi qaamanermik utersaartitsineq 20 procent angullugu annikilleriarpoq. Tamatumalu kingunerisaanik sermersuup aakkiartornera sukkanerulerluni.
Nunarsuarmi silap kiannerulernera pissutaalluni sermersuarmi aputip sananeqaataa allanngorpoq tassalu qaamanermik utersaartitsinikinnerulersimalluni.