Sermersuaq qanoq aatsigisimanersoq misissussavaat
Nunatta sermersuata aakkiartornera ukiuni kingullerni nalornissutigineqarpallaaqimmat tullissaani uuttortaasoqalerpat qanoq aatsigisimanersoq misissuisoqassaaq.
- Qalasersuup eqqaani silaannaap allanngoriartornera nunarsuup sinnerani uumassusilinnut pingaaruteqartorujussuuvoq. Nunatta sermersua tamakkerluni aassagaluarpat, nunarsuarmi imaq 7 meterimik qaffassaaq, danskit avatangiisinut ministeriat Connie Hedegaard oqarpoq.
Danmarkimi Kalaallit Nunaannilu ujarassiuutut misissuisarfik, GEUS, aappaagu sermersuup eqqaani sumiiffinni arfineq-marlunni uuttortaatinik ikkussuissaaq uuttortaatillu ukioq 2010 ilanngullugu uuttortaassapput.
Nunatsinni silaannaap sermersuullu allanngorarneri sapinngisamik pitsaanerpaamik malinnaaffigisinnaajumallugit uuttortaatit imminnut ungasillillugit ikkussuunneqassapput.
Kitaani ikkussuutassat Qaanaap, Upernaviup, Nuup aamma Qaqortup eqqaannut ikkussuunneqassapput. Tunumi ikkussuutassat Station Nordip, Illoqqortoormiut Tasiilallu eqqaanut ikkusuunneqassallutik. Nunatta kujataani misiliutitut uuttortaatinik siusinnerusukkut ikkussuisoqarnikuuvoq.
