Sermersuaq pillugu saqqummiussivoq
Maluginiarutsigu sumi apinerusalernersoq takusinnaavarput Upernaviup eqqaaniit Nuup eqqaani apinerusalersoq, tassunga pissutaavoq maani Nuup eqqaani silaannaq aputip aassinnaaffiata missaani nillissuseqartarmat taamaalillutillu nuissat apititsinerusarmata, issippallaaraangalli soorlu 30 gradenik issikkaangat silaannaq nittaalartalinnik nuisserneq ajorpoq. Taannarpiarlu pissutaalluni sermersuup qeqqani silaannaq kissakkiartormat apinerusalerpoq sulili sermeq aatsittarnagu, taamaammat sermersuup qeqqa issutsikkiartorpoq. Sermersuup qeqqanik taavakka immap qaavaniit 2.000 meterinik 2.500 meterinilluunniit qatsinnerusut, tassalu avannaani kilometerinik arlalinnik untritilinnik tiffasitsigisumiit kujataani avannarpasissutsip 68 gradep nalaaniit sermersuup kujammut isuata tungaanut, tassa sermersuup qatsineruffia.
Carl Egede Bøggildip aamma erseqqissarpaa apummiit serminnguuttartumiit sermeq aattartoq annertunerusoq taamaalillunilu sermersuaq ataatsimut isigalugu annikilliartortoq.
