Sermersuaq naatsorsuutigisamit annikinnerusumik aassimavoq
Ukiut 125.000-t matuma siorna, Eem-ip nalaani, Kalaallit Nunaata silaa ullumikkumut naleqqiullugu gradinik 8-nik kiannerusimavoq. Taamanilu kiannerugaluartoq Sermersuup aakkiartornera naatsorsuutigisamit annikinnerusimavoq. Sermersuarmi qilleraluni misissuiviup Neem-ip ilisimatusarnikkut paasisai tamatuminnga takutitsipput.
Sermersuup Eem-ip nalaani annertussutsimi sisamararterutaa annaasimavaa, suliniummi Neem-imi pisortaq, professor Dorthe Dahl-Jensen Københavnip Universitetiani Niels Borh Instituttimi Sermimik Silallu pissusaanik misissuivimmeersoq nassuiaavoq.
Tamatuma sermip aakkiartornerata peqatigisaanik sermip imaata tungaanut ingerlaartarnerata kigaallakkiartortarneranik peqquteqarsinnaanasoraa.
Kalaallit Nunaalli piffissami tassani nunarsuup imartaata meterit marluk missaannik qaffatitsiinnaraluartoq, imaata meterit sisamat arfineq pingasullu akornanni qaffassimanera ilisimaneqarpoq. Qalasersuup kujalliup aakkiartorsimaneranik tamanna peqquteqarpoq, Dorthe Dahl-Jensen oqarpoq. Issittulli Qalasersuullu kujalliup oqimaaqatigiinnerisa paarlaannissaat ukiut tuusinterpassuit aatsaat qaangiuppata pissasoq erseqqissaatigaa.
Eem-ip nalaata soqutiginaqutaa tassaavoq ukiut 100-t qaangiuppata silap pissusilerigassaanut eqqaanarmat. Dorthe Dahl-Jensenilu naapertorlugu Kalaallit Nunaata silaa gradit arfineq pingasut missaannik kiannerulerumaarpoq, nunarsuullu sinnerata silaa gradinik marlussuinnarnik kiannerulerumaarluni. Misissuivimmi Neem-imi ilisimatuut siunissap qanoq isikkoqalerumaarnera aasaq paasisaqarfigaat.
-Sermersuarmiinnitsinni siallerpoq, tamanna siornatigut pisimanngilaq. Allaammi neriusaamik takuvugut. Aasaq takusarput kissatsippat qanoq pisoqarnissaanik ilimasaarivoq.
