Sermersuaq itivillugu arpannissaq suli aallartisavinngitsoq
Arpattartut taakkua marluk Nivi Geisler aamma Louise Petersen arpannissamut pilersaarutiminnut SILA run the icecapimut millionit koruuninik katersuiniarsaripput. Arpaatinik sermersuarmik itivinnissaq siunertaavoq – aatsaavissuarlu taamaattoqassaaq.
Anguniakkamullu taamaattumut tapersersorneqarnissaq pisariaqarpoq, uanilu aningaasaliisussanik ajornartorsiorfiuvoq.
- Suli aningaasaliisussarsinngilagut, akiuuppugulli suli, Nivi Geisler oqarpoq.
Kalaallit Nunaanni Danmarkimilu suliffeqarfinnut assigiinngitsunut aningaasaliisussanik qaammatit marluk sinnerlugit ujaasisarsimagaluarput, arlaannaaluunniit aningaasaliissutilisarluni uterfiginnissimanngilaq.
Assartuinermut, aqqutissamik unnersuussisumut, atortussanut, sillimmasiinermut nerisassanullu aningaasartuutinut matussusiinissamut katillugit millionit koruunit missarluinnaat pisariaqartippaat.
- Arpalluta itiviissagutta oktobarip qiteqqunnerata tungaanut aningaasat katersoreersimasussaavagut, Nivi Geisler oqarpoq.
Iluatsissappat taakku marluullutik ukiup tulliani maajip qiteqqunnerani arpannertik aallartissavaat. Kangerlussuarmiit Isortumut marluullutik arpannissallutik pilersaarput.
Sungiusarneq ingerlaannartoq
Naak aningaasaliisussat utaqqinaraluartut arnat taakku marluk suli sungiusartuarsinnarput.
- Aasaq manna isorartuunut arpareerpugut. Tamattalu sungiusarluarsimaqigatta piareeqqavugut. Unamminernilu peqataaffigisatsinni aamma angusarissaarluaqaagut, Nivi Geisler oqarpoq.
Sungiusarluarsimagaluaqalunili sermersuup itivinnissaanut immikkorluinnaq piumasaqaatitaqassasoq taassuma ilisimavaa.
- Issippormi sunalu tamarmi qaqortuinnaalluni. Allamik soqanngilaq. Sianissutsikkulli unamminarnerpaassagunarpoq. Nukittugaluaruttaluunniit unammillernartorujussuusussaasoq qularinngilara. Ullummi 30-t missaanni sermersuarmiittussaavugut, taanna oqarpoq.
600 kilometerit missaanni isorartussuseqartoq – ullormut 20 kilometeri anguniartarlugu – arnat taakku ullut 30-t missaanni itiviiniarsariniarput.
Tamatuma saniatigut aqqut tamakkerlugu arpaatinik kamippaqarniarmata itiviinissap immikkuullarequtigaa.
- Arpaatit kamippaat Inov8 piumaneruakka, Nivi Geisler oqarpoq.
