Sermersuaq allanngujuitsoq
![](/sites/default/files/styles/image_934x467/public/article_images/indlandsis_kangerlussuaq_630_2.jpg?itok=9wIEtAu8)
- Issoq uumassusilik naasullu ilamerngi sermersuup naqqani nunami qeriuaannartumi nassaaraavut, taakku tamarmik 2,7 millionit sinnerlugit pisoqaassuseqarput, ujarassiooq Paul Bierman atuagassiamut Sciencemut taama oqarpoq.
Nassaat taakku takutippaat Kalaallit Nunaata sermersuata silaannaap allangorarneranik nalaanneqartarsimanera, ilimagisamillu sivisunerujussuarmik tamanna pisarsimasoq.
Nassaat assut uissuummisitsipput, sermersuup allanngujuinnerata takutimmagu silaannaap allanngorarnerata ullumikkut atuuttup kingunerisaanik imaq qanoq annertutigisumik qaffassanersoq.
-Silaannaap allanngorarnera pillugu apeqqutit pingaarutillit ilaat tamaalillutik akineqarsinnaanngorput, ilisimatooq misissueqataasoq Dylan Rodd oqarpoq.
Kalaallit Nunaata sermersuata taamani qerinerata nalaani sila qanorluunnit kissatitsigigaluaraangat allanngujuilluni taamaattuaannarsimasoq paasisat takutippaat.
-Sila qanorluunnit kissatsigigaluaraangat sermersuaq nunguilluni aattarsimanngilaq, masarsuk naqqaniittoq taamaalilluni ukiuni milliuunilippassuarni allanngorneqarnani sermimit qallerneqaannarsimavoq, Paul Bierman nassuiaavoq.
Masarsuk sermersuup naqqaniittoq sermimit qallerneqannginnermini ukiuni 800.000-ini masarsuusimavoq, ukiorpassuarnilu silaannaap allangorarnerata nalaattarsimagaa ilisimatuut naliliipput.