Sermersuaq aakkiartupiloortoq angalaffigeqqujunnaarpaat

Sapaatip akunnera kingulleq nunasarnermat sermersuup qaava aattulersimavoq tamatumalu kingunerisaanik kooqalerpoq tatsillu angisuut pilerlutik, tamannalu nalinginnaasumik qaammammik ataatsimik sioqqutsillutik aattulerput, Avatangiisinut Naalakkersuisoqarfimmi allaffimmi sulisoq Martin Shiøtz oqarpoq.

Sermersuarmik itiviiniarlutik angalasut tuluit nunaaninngaaneersut pingasunik inuttaqartut, tunumi Isortumit Kangerlussuarmut ingerlaartut, Kangerlussuarmit 60 kilometerit missaannik kangisitsigisumiittut Air Greenlandip qulimiguaanik aaneqartariaqarsimapput, angallavigisaat taseqalersimammat annertuumillu kuullluni. Taseq 100 meterinik annertussuseqarpoq 4 - 5 meterinillu itissuseqalersimalluni, Martin Shiøtz oqarpoq. Angalaqatigiit ingerlaqqissinnaajunaaramik Namminersorlutik Oqartussanut saaffiginnipput ikiorneqarnissaminnik kissaateqarlutik. Saaffiginnissutaat politiinut ingerlateqqinneqarpoq, nunami annaassiniarnerit politiit isumagisassarimmassuk. Angalaqatigiit aqqutit allat atorlugit ingerlariaqqissinnaanersut paasiniarneqarpoq, tamannali ajornarmat, Air Greenlandip qulimiguuanik aaneqarput, Kangerlussuarmut apuunneqarlutit, tamarmillu ajunngitsut nalunarutigineqarpoq.

Sermersuarmik itiviiniarnerit tamarmik tallimanngorpat unitsinneqarput, tamanna ilaatigut politiinit inassuteqartoqarnera aammalu Kangilinnguani sinerissammik nakkutiliisoqarfimmit inassuteqartoqarnera tunngavigalugu.

Sermersuarmik itiviiniartut arfinninngormat sinerissami sakkutooqarfimmit aaneqarput, taakkua sumiinnertik nalunaarutiginngimmassuk, ujarneqarnermi kingorna aaneqarput.

Allat angalasut aamma aaneqartariaqarsimapput, angalaqataasut ilaat napparsimalersimammata.

Angalaqatigiit allat pingasut nammineerlutik Kangerlussuarmut anngunnissaat naatsorsuutiginearpoq.

Sermersuarmik itiviinniarlutik pilersaaruteqartut arfineq marluk taamatinneqarput.

Sermersuarmik itiviisinnaaneq aatsaat aallarteqqinneqarsinnaaavoq septemberip ulluisa 15anni