Sermersuaq aakkiartupiloorpoq
Kalaallit Nunaanni silap issangiarnerata kingorna sermersuaq annertuummik aakkiartortoq, silap pissusaa pillugu ilisimatuut naliliipput.
Sermersuaq aasap ingerlanerani 540 kubikkilometerinik annikinnerulertoq, silap pissusaanik ilisimatuup Sebastian Mernildip naatsorsugaasa takutippaat.
Ukiup ataatsip ingerlanerani
Sermersuup aakkiartornera ukiup ataatsip ingerlanerani 25-50 procentimik annertunerulerpoq, imeq taamatut annertutigisoq Danmarkimi ukiuni untritilinni arlaqartuni atorneqartarpoq.
Kalaallit Nunaanni sila ukiuni kingullerni qulini aqqaneq marlunnilu kiatsikkaluttuinnarpoq, silap pissusaanik ilisimatooq Sebastian Mernild aviisimut Jyllandspostenimut oqarpoq.
Kalaallit Nunaanni ukioq 1972-mi silap annertuumik issangiarnera pissutaalluni sermersuup 17 procentia aakkiartorpoq, ukiormannalu aasap ingerlanerani kiarujussuarmat sermersuup affaa sinnilaarlugu aakkiartorpoq, tassalu 52 procentia aakkiartorluni, Sebastian Mernild oqarpoq.
Sebastian Mernildip naatsorsugai USA-mi silap pissusaanik ilisimatuumit Jason E. Boximit ilalerneqarput.
Kalaallit Nunaanni silap kiassusianik nillertigineranillu uuttortaasarneq ukioq 1873-imili aallartinneqarmat Sermersuaq aatsaat taamak aakkiartortigaaq, Jason E. Box aviisimi Jyllandspostenimi taamatut issuarneqarpoq.
