Sermersuaq aakkiartunnginneraraa

- Nunarsuup kissatsikkiartorneranik peqquteqartumik Kalaallit Nunaata sermersuaa aakkiartornavianngilaq, aakkiartornerarluguuna oqartoqaraangat annilaangasaarisoqartartoq.

Taamatut aviisimut Politikken-imut oqarpoq Bjørn Lomborg. Taassuma atuakkiani taaguuteqartoq: ”Verdens Sande Tilstand” kalaallisuunngorlugu nunarsuup qanoq-issusiata ilumoortortaanik nutserneqarsinnaagunartoq ilisimaneqaatigaa. Atuakkamilu tassani oqaluttuarineqarpoq, nunarsuaq pillugu aarlerisaarinerit ilimagisatsituut ajortiginnginnera.

Lomborg-illu oqarnera naapertorlugu, illut naatitsiviit nassaarineqanngikkallarujussuarmatali sermersuaq aakkiartorluni aallartissimavoq.

Allaaserisamilu Bjørn Lomborg ilaatigut ima oqarpoq.

- Kalaallit Nunaani sermersuaq aakkiartornerarlugu oqalunneq eqqunngilaq, ilisimatusarnerimmi paasinarsisippaat sineriammi sukkanerusumik aakkiartorneqartoq nunallu qatsissortaaniittut qaqqat sermillit aakkiartorneruleriartormata 1992-mili tamatuma sunniutaa agguaqatigiissillugu annertusiartorsimalluni. Tassalu imaappoq Sermersuup immannera ukiumut 5 cm-imik qaffariartittarlugu.

Silap pissusia pillugu ilisimatuup allap Jens Hesselbjergip Christensenip tamanna isumaqatiginngilaa.

- Taamaattoqanngilluinnarpoq, sermip aakkiartorneranut illut naatitsiviit sanilliunneqarsinnaanngillat. Sermersuumuna aakkiartornera sakkortusiartortoq, ilisimatooq Jens Hesselbjerg Christensen oqarpoq.