Sermersooq: Suliniutinut angisuunut inatsisip tusarniaassutigineqarneranut akissuteqarnissamut piffissakippallaaqaaq

Inuussutissarsiornermut, Aatsitassanut Suliffeqarnermullu Naalakkersuisoqarfik inatsisissatut siunnersuut maajip arfineq-pingajuani tusarniaassutigalugu nassiuppaa ulloq maajip 16-iat akissuteqarnissamut piffissalerlugu.

Tamannalu sivikippallaartoq Kommuneqarfik Sermersooq tusagassiorfinnut nalunaaruteqarluni taama allappoq. Taama sivikitsigisumik piffissaliisoqarneratigut kommuni tusarniaanermut akissuteqarnissani taamaatiinnartariaqarpaa..
 
 - Tusarniaassutit taama ittut politikkikkut oqaluuserineqartussaapput, kisianni ullut arfineq pingasut periarfissaralugit, ataatsimiititamik kommunalbestyrelsimillu katersuutsitsinissaq periarfissaanngilluinnarpoq. Isummagut apuukkusoqaagut, kisiannili politikkikkut eqqartuineq pinngitsoortillugu inatsisissatut siunnersuut nukinngutiginianngilarpu, borgmester Asii Chemnitz Narup taama oqarpoq.
 
Kommuneqarfimi Isumaginninnermut, Suliffeqarnermut Inuussutissarsiornermullu Ataatsimiititami siulittaasup, Malene Lyngep borgmesterini isumaqatigaa.
 
- Avataanit suliartortut maannakkut politikkikkut taama nakkutigineqartigitillugit, avataaniit suliartortussat 1000-ilikkuutaat sap. ak. sivikinnerusumik piffissaqartinneqarluta Naalakkersuisunit isummerfigeqquneqarnerput assut eqqumiippoq. Pingaartumik inatsisissatut siunnersuummi arlallit ernumanartoqartillugit, Malene Lynge taama oqarpoq.
 
Pilersaarutit malillugit inatsisissatut siunnersuut Inatsisartuni maajip 20-iani suliarineqartussaavoq. Taamaasilluni Inuussutissarsiornermut, Aatsitassanut Suliffeqarnermullu Naalakkersuisoqarfik tusarniaanermi akissuteqaataasut ullut sisamaannaat atorlugit inatsisissamut ilannguttariaqartussaassavai.