Sermersooq suliffissaqartitsiniarnermut iliuusissanik pilersaarusiortoq

Suliffissaqartitsinermut tunngasut misissoqqissaarneqarnerat tunngavigalugu, Kommuneqarfik Sermersuumit iliuusissamik pilersaarummik annertuumik aallartitsisoqarpoq, taannalu Kommunalbestyrelsimit sapaatip akunnerata tulliani oqaluuserineqassaaq.

Kommunimi pisortaaninngorlaap Steffen Ulrich-Lyngep nassuerutigaa Kommuneqarfik Sermersuumi suliffeqarnermut immikkoortortaqarfiani aaqqissuussaanikkut unammilligassaqartoq. Nutaamillu eqqarsarnissaq pisariaqarsimavoq.
- Deloittep 2013-imi upernaakkut misissueqqissaarnera inaarneqarmalli, sulineq annertooq aallartinneqarpoq, kingunerisaanillu suliassaqarfik pillugu iliuusissamik pilersaarusiortoqarluni. Iliuusissatut pilersaaruteqarnikkut suliffissaqartitsinermut sulianut sunniuteqarluarnissaannik qulakkeerinnittoqassaaq, Kommuneqarfik Sermersuumilu taamaasilluta inuiaqatigiit akornitsinni atugarissaarnitta attatiinnarnissaannut inerisarnissaannullu pisarialimmik iliuuseqarfigissavarput.

Iliuusissatut pilersaarut suliniutinik tigussaasunik nutaanik imaqarpoq, taakkulu tamarmik immikkut suliffissaqartitsiniarnermut tunngasunik kivitsisussaassaapput. Taakku aqqutigalugit innuttaasunik kiffartuussineq pitsaanerulersinneqassaaq.

Kommunalbestyrelsi ataasinngorpat aggustip 26-iani suliffissaqartitsinikkut killiffik iliuusissatullu pilersaarut ataatsimiissutigissavaat, marlunngorpallu pilersaarut saqqummiunneqartoq politikkikkut aalajangiiffigineqassaaq.

Iliuusissatut pilersaarut kommunalbestyrelsip ataatsimiinneranut atatillugu avammut sammiunneqassaaq.