Sermersooq sammisassanut akeqanngitsumik peqataanissamut allagartamik atuutilersitsisoq
Ilaqutariit pissakinnerusut meerartaasa sunngiffimmi soqutigisaannut tapersiinikkut meeqqat tamarmik timersornissaannut sunngiffimmilu sammisassaqarnissaannut aqqutissiuussissaaq, meeqqat tamarmik isikkamik arsaattalersinnaanissaat karatertalersinnaanissaalluunniit suliniutigineqassaaq, ilaqutariillu nammineq akiliinissaminnut ajornakusoortitsisut sammisassaqartitsiniarnermut akeqanngitsumik peqataanissamut allagartaqalersinnaanissaat Kommuneqarfik Sermersuumi kommunalbestyrelsip apriilip ulluisa 19-ianni ataatsimiinnerminni aalajangerpaat.
Peqatigiiffinni sammisassanut tamanut isersinnaanissamut uppernarsaat aqqutigalugu sammisassat assigiinngitsorpassuit aallunneqarsinnaassapput, isikkamik arsaanneq, erinarsoqatigiinni erinarsorneq, assammik arsarneq, timi atorlugu unammineq, nalunneq, pisisserneq, volleyballerneq, sisorarneq, sangusaarneq snowboardernerlu assigiinngitsorpassuillu allat sammineqarsinnaassapput, isersinnaanissamut uppernarsaat aqqutigalugu peqatigiiffinnut ilaasortanngortoqarsinnaassaaq, aningaasartuutillu kommunimit akilerneqartassallutik.
Inoqutigiinni isertitaqqortussuseq meeqqallu ilaqutariinni amerlassusaat apeqqutaalluni taperserneqarnissamut aallaaviussapput.
Meeraq ataaseq akiliut 500 koruunit ataappagu meeraq arlalinnik sunngiffimmi soqutigisarnissaminut periarfissaqassaaq.
- Sammisassanut akeqanngitsumik peqataanissamut allagartaqartitsilernissaq, meeqqat tamarmik sunngiffimmi soqutigisaqarnissaannut assigiimmik periarfissinneqassapput, Meeqqanut, Ilaqutariinnut Atuarfeqarnermullu Ataatsimiititaliami siulittaasoq Poul Hansen, Demokraatineersoq, oqarpoq.
Sammisassanut akeqanngitsumik peqataanissamut allagartaqartitsinissamut ukiumut missingersuutinit 500.000 koruuninik immikkoortitsisoqartoq Kommuneqarfik Sermersuup nalunaarutigaa, meeqqallu 1000-it aaqqiinermut peqataasinnaanerinut naammannissaa naatsorsuutigineqarluni.