Sermersooq Qinngutsinni inissianut 250-inut sanaartorfissanik periarfissiisoq
Kommuneqarfik Sermersooq tusagassiorfinnut nalunaaruteqarluni taama allappoq.
Qinngutsinni illoqarfimmi ukiuni aggersuni inissianik nutaanik 250-inik sanaartornissaq qilanaarineqarsinnaavoq. Tamanna Kommunalbestyrelsip ataatsimiinnermini kingullermi akuersissutigaa.
Ineriartortitsineq inissialiornerlu nunataanut naleqqussarlugit ingerlanneqassapput, qulakkeerneqassallunilu sanaartugassat qanittuini avatangiisit toqqisisimanartuunissaat. Sanaartorfissat affaata missaat namminersortunut agguarneqassapput, sinnerilu pisortat sanaartugassaannut agguaanneqassallutik.
Kommunalbestyrelsip ataatsimiinnerani aamma tassani Kommuneqarfik Sermersuumi qinikkat akuersissutigaat, immikkoortumi Nuukullaap Mannguani –Svend Jungep Aqqutaata eqqaani – inissialiortoqarlunilu inuussutissarsiorfiliornissaq. Amerlanerpaamik arfinilinnik quleriilinnik inissialiortoqassaaq aamma inuussutissarsiorfiit illutai mikinerumaat pisiniarfittaqarsinnaasut. Immikkoortumi nutaanik sanaartornermi sanaartorfissat sisamaapput.
- Nuummi najugaqarnissamut inuussutissarsiutitigullu ingerlatsinissamut periarfissat annertusartuarneri ingerlanneqartut pitsaalluinnartuullunilu assut annertuvoq. Inuit illoqarfiit pingaarnersaanni najugaqarusuttut amerligaluttuinnarput, taamaattumik Nuuk siunissaq eqqarsaatigalugu ingerlaavartumik qulakkeerinissaq annertuumik uagutsinnut piumasaqaataavoq. Inuit amerliartornerat aningaasatigullu siuariartorneq taakkuusussaapput Nuup ineriartortinneqarneranik napatitsisussat, ataatsimiititami siulittaasoq Mille Søvndahl Pedersen (IA) taama oqarpoq .
