Sermersooq oqartussaaqataatitsinissamut appimik saqqummersitsisoq
Appi taaguuteqartoq 'Isumaga' sapaatit akunneri marluk matuma siorna saqqummersinneqarpoq. Innuttaasullu maannamut 159-it appikkut nittartakkakkullu nalunaarsorneqarsimasut kommunip KNR-imut ilisimatitsissutigaa.
Appi innuttaasut sammisanut qinikkanit kommunimillu pingaartinneqartunut assigiinngitsunut taasitinneqartassapput. Innuttaasut sunik kissaateqarnerat qinikkanit paasisaqarfiginerunissaat tamatumani siunertaavoq.
Taasititsinerit maannamut pingasut ingerlanneqareerput taasinerillu 300-t missaanniissimallutik.
AAMMA ATUARUK App nutaaq Nuummi takornarianut ilitsersuutaassasoq
Inuusuttut oqartussaaqataanermut kommunillu sulineranut peqataatinnissaat immikkut siunertaralugu Isumaga ineriartortinneqarpoq.
- Inuusuttut peqataatinneqarnissaat pingaaruteqartorujussuuvoq. Taakkua oqariartuutaat tamatigut tusaaneqarneq ajorput, kisiannili tusarfiginissaat pingaarteqaarput, borgmester Asii Chemnitz Narup taama oqarpoq.
Appikkut pointinik katersisoqartassaaq, taamaasillunilu peqataasut imminnut unammisinneqartassallutik. Peqataasut apeqqutinik amerlanerusunik akissuteqarsimasunut pinnattassaaqqartitsilluni makitsisoqartassaaq.
Appi kommuni tamakkerlugu atorneqarsinnaasunngorlugu ineriartortinneqarsimavoq. 4 mb-iiinnaavoq, atornissaalu paasissutissarpassuarnik pisariaqartitsiffiunani, kommuni taama allappoq.
