Sermersooq: Nalimmassaaneq annernarsinnaavoq

Siunnersuut piviusunngussappat Kommuneqarfik Sermersooq kiisalu Qeqqata Kommunia 200 millionit koruunit tungaanut avannaanut kujataanullu tapiissuteqartalissaaq.

Kommuneqarfik Sermersuumi kommunalbestyrelsimi ilaasortat ataatsimoorussamik innuttaasunik ataatsimiititsinerminni nalimmassaaqqinnerup kingunerisinnaasai, tassaasut sumiiffinni assiginngitsuni sipaarniarnerit, saqqummiuppaat.

Ataatsimiititsinermi ersaattaattoqaraluartoq sammisaq nikallunganarpoq. Kommuneqarfik Sermersooq, kommunini pissakinnerpaatut inississaguni, qanoq pissutsinut tulluussartoqarnissaa eqqartorneqarpoq, borgermesteri Asii Chemnitz Narup ingerlatsisoralugu.

- Ersiqqissartariaqarpara kingunerineqarsinnaasut assersuutaannaammata. Kisianni isumaqarsimavugut kommunalbestyrelsimi kingunerineqarsinnaasut saqqummiuttariaqarigut innuttaasunut, Asii Chemnitz Narup, ippassaq unnukkut KNR-imut, nassuiaavoq.

Sipaarfigineqarsinnaasut assersuutit arlallit saqqummiunneqarput. Sunngiffimmi meeqqanut annernut paaqqinnittarfiit peerneqarpata 24 millionit koruunit sipaarneqarsinnaapput. Ittoqqortoormiuni Qeqertarsuarmilu Utoqqaat Inaat matuneqarsinnaanera eqqaaneqarpoq. Sumiiffinni aaliangersimasuni sipaarniarneq pinnagu, Kommuneqarfik Sermersuumi atorfillit 160-iusut aamma soraarsitaaratarsinnaasut oqariartuutigineqarpoq.

Facebook-imi politikkikkut oqalliffimmi ataatsimiinnerup kingorna oqallittoqarpoq.

- Ataatsimiititsineq isumaqatissarsiornerinnaavoq IA-mit ingerlanneqartoq, ataaseq taama allappoq. Allalli akivaa, ataatsimiisitsineq partiilersorani kommunalbestyrilsimit ataatsimoorullu ingerlanneqartoq.

Borgemesteri isornartorsiuineq ima oqaaseqarfigaa:

- Taamaattoqanngilluinnarpoq. Uagut misigisimavugut 56 millioninik piiaaffigineqassagutta - takoreersinnaavarput - kinguneri annertoorujussuussasut, kingunerisinnaasaalu annernartorujussuussasut. Tamakkua innuttaasutta ilisimasariaqarpaat, naggasiivoq.

Ippassaq unnukkut ataatsimiititsineq partiinit tamanit peqataaffigineqarpoq.