Sermersooq MIO-lu suleqatigiilersut
- Meeqqat pisinnaatitaaffiisa patajaallisarnissaat kiisalu Kommuneqarfik Sermersuumi meeqqat pisinnaatitaaffiisa ilisimaneqarnerulernissaat suleqatigiinnissami siunertarineqarpoq aamma suleqatigiinnikkut kommunimi politikerit, meeqqanik suliaqartut kiisalu inersimasut meeqqanut avatangiisaasut meeqqat pisinnaatitaaffiisa ataavartumik patajaallisaafigineqarnissaannut qulakkeerinneqataassasoq, kommuneqarfik Sermersooq aamma MIO tusagassiuutinut nalunaaruteqarlutik taama allapput.
Suleqatigiinnissamik isumaqatigiissut ukiup sinneranut atuuppoq.
-Meeqqat tamarmik inuunerissuunissamut pisinnaatitaaffeqarput.
- Meeqqat pisinnaatitaaffiinik eqqortitsinermut tunngatillugu kiisalu angajoqqaat inuiaqatigiillu pisussaaffinnut akisussaaffiinnullu tunngatillugu siuttoorusuppugut, borgmester Asii Chemnitz Narup oqarpoq, nangillunilu - MIO-p qissimigaartassagaatigut neriuutigaarput, kiisalu suleqatigiinneq meeqqat namminneerlutik inuunerminnut isiginneriaasaannik paasinniffiunerunissaa neriuutigaarput. Meeqqammi inuunnerinnerup suunera namminneerlutik nalunngilaat.
Inersimasut uagut naalaartassavagut, uagulli akisussaaffimmik tigusisartussaavugut, Kommuneqarfik Sermersuup borgmesteria oqarpoq.
Taanna neruppoq MIO suleqatigalugu kommueqarfik sermersuummi ilimagisat tusakkallu aallaaviginagit, piviusumik ilisimasat aallaavigalugit iluuseqartarnissaq kissaatigineqarmat.
Meeqqat illersuisuat Aaja Chemnitz Larsen suleqatigiinnissamut qilanaarpoq tamannalu pillugu ima oqaaseqarpoq
- Inatsisit inuunerullu ingerlarnani assigiinngisuseq unammilligassatsinni annersaavoq.
Meeqqammi pisinnaatitaaffii meeqqerivinni, atuarfinni, sunngiffimmi ornittakkani, isumaginnittoqarfimmi, aammali inuusuttut imminerminnut tunngasunik aalajangiivigineqarnernimmut akuutinneqarnerisigit pisarput, meeqqat illersuisuat Aaja Chemniz oqarpoq, taanna suleqatigiinnissamut qilanaarpoq ungasinnerusorlu eqqarsaatigalugu neriuppoq nunatsinni kommunit sinneri pingasuusut assingusumik isumaqatigiissuteqarfigineqarsinnaannerannik.