Sermersooq makittarissivoq

Kommuneqarfik Sermersuumi illoqarfiit anginersaat, Nuuk, siuttoralugu kommuni ineriartortuarsinnarpoq. Tamanna kommunip aappaagumut missingersuutaani, kommunalbestyrelsimit ullaap tungaani saqqummiunneqartussani, takuneqarsinnaavoq.
Allattoq Elisa Isaksen
novembarip 24-at 2011 07:34

Kommunimi, 22.000-inik inoqartumi, aappaagu isertitassatut naatsorsuutigineqarput 1,4 milliardit koruunit, aningaasartuutissallu 1,3 milliardit koruuniussallutik, 2012-illu naanerani 163 millionit koruuninik sinneqartoortoqassalluni.

Akileraarutitigut isertitassat amerliartuinnartut, allaffissornikkut ingerlatsinikkullu ileqqaarutissat, kommunillu meeqqeriviini ingerlataanilu akiliutinik qaffaatsiarnikkut missingersuutini sinneqartoornissami tunngavigineqarput.

Tamatuma kinguneranik Kommuneqarfik Sermersuumi innuttaasut sanaartornernut 224 millionit koruunit nalinginik sanaartorfigineqassapput - matumani inissialiornerit meeqqerivinnillu sanaartornerit pineqarnerullutik. Allatut oqaatigalugu sanaartortoqangaatsiassaaq.

Taamaattorli kommuni aappaagu ukiup naanerani 122 millionit koruuninik tigoriaannarnik aningaasaateqassaaq.

Kommunimilu akileraarutit procentiat Nunatsinni aappaagu suli appasinnerpaassaaq. Allannguuteqarani 25 procentiussagami.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq