Sermersooq ingerlalluaqaaq

- Qanoq iliornikkut innuttaasut ataavarnerusumik suleqataatissinnaavavut sunniuteqaqataatillugit, akisussaaqataatillugillu. Tamanna isumaliutigisarpara, aamma maani kommunalbestyrelsimi oqallisigisarparput, Asii Chemnitz Narup oqarpoq.

Tassami qinikkat ikilipput, kommunilu siammasissorujussuulluni. Taamaattoq iluarsiissutaasinnaasunik maanna tikkuussisinnaannginnerarpoq, kommunalbestyrelsimili tamanna pillugu oqallittoqartarnerarlugu.

1,4 milliardit koruunit missaat aappaagu isaatitassatut naatsorsuutigineqarput, aningaasartuutissallu 1,3 milliardit koruunit missaanniissangatinneqarlutik.
224 millionit koruunit sanaartornernut atorneqassapput, kommunillu aappaagu ukiup naanerani 122 millionit koruuninik tigoriaannarnik aningaasaateqarnissaa siunniunneqarluni.

Namminersorlutik Oqartussat kommunillu akornanni aningaasatigut suleqatigiinnerup oqaluuserineqarnissaa, Asii Chemnitz Narupip ujartorpaa:

- Namminersorlutik Oqartussat kommunillu akunnitsinni siunissami aamma qanittumi aningaasatigut qanoruna suleqatigiissasugut? Taanna ersernerlukkami. Taamaammat erinigaara Naalakkersuisut kommuneqarfiillu akornanni aaqqissuussaanerusumik oqaluuserineqarnissaa, Asii Chemnitz Narup oqarpoq.

Siunissaq qaninnerusoq ungasinnerulaartorlu eqqarsaatigalugu Kommuneqarfik Sermersuumi aningaasanik isaatitsinerulernissaq qulakkeerneqartariaqartoq, Asii Chemnitz Narupip ilanngullugu oqaatigaa, innuttaasut matumani pingaartumik ilinniarluarsimanngitsut piginnaanngorsarnissaat ilungersuutigineqartariaqartutut nalilerlugu:

- Aatsitassarsiornikkut immaqalu aamma uuliasiornermi sulisussarsiortoqartillugu uagut innuttatta aamma naammattunik piginnaasaqarlutik imminnut neqeroorutigisarnissaat pingaartuusoraara, Kommuneqarfik Sermersuup borgmesteria Asii Chemnitz Narup  oqarpoq.

Kommunimi akileraarutit procentiat Nunatsinni aappaagu suli appasinnerpaassaaq. Allannguuteqarani 25 procentiussagami.