Sermersooq illoqarfinni sisamani foodfestivalertitsilersoq
Tassami Kommuneqarfik Sermersuumi illoqarfinni sisamani Nuummi, Paamiuni, Tasiilami Illoqqortoormiunilu sapaatip-akunnerata naanerani Foodfestivalertitsisoqassaaq.
Sermersuumi Inuussutissarsiornermut Siunnersuisoqatigiit Foodfestivalimik aaqqissuisuupput, inuussutissallu nunatsinneersut atorneqarnissaat aallunneqassalluni. Inuussutissarsiutiginagu igasut arfininngorpat septembarip ulluisa 20-anni unammisinneqassapput.
Igaat nerisassallu unammissutigineqartussat tassaapput paarnat imaluunniit naatitat akuutisat urtit, igaat imarmiut kiisalu igaat nunamiut.
Nuummi suliffeqarfiit inuussutissat nunatsinneersut aallaavigalugit "nerisassiat ilisarnaatitik" aamma unammissutigissavaat.
Nerisassialli kisimik sammineqassanngillat. Kommuneqarfik Sermersuumimi illoqarfinni tamani atuarfiit alloriarneq 2-miittut titartaalluni unammisitsinermut peqataanissamut aamma kaammattorneqarput, inuussutissat nunatsinneersut aallaavigalugit atuarfinnut taquarisartakkat suusarnersut takutinneqassalluni.
Ilusilersuisartut aamma peqataatinneqassapput
Atisanik ilusilersuisartut titartaallunilu ilusilersuisartut ilusilersuinermik unammisitsinissamut peqataanissamut aamma kaammattorneqarput, inuussutissallu nunatsinneersut matumani aamma ilisarnaaserneqarnissaannut siunnersuuteqarlutik unammisinneqassallutik.
Oqaluttuartitsinermik aamma unammisitsisoqarumaarpoq, tassa illoqarfinni aallussisut aallarnisaasullu isumassarsiamik tunuliaqutaasa oqaluttuassartaasa, inuussutissanillu nunatsinneersunik atuisarnerminni, naatitanik naatitsisarnerminni assigisaannilu misilittakkatik pillugit saqqummiussinissaminnut kaammattorneqarlutik.
