Sermersooq: Doris Jakobsen eqqunngilluinnartumik oqaluppoq
Aammattaaq oqaatigaa, kommunimi atorfiit akissarsiakinneruffiusut kalaaliinnarnik inuttalerneqartartut. Kalaallilli Nunaanni Naatsorsueqqissaartarfiup misissuinerata takutippaa, taamaanneraaneq eqqunngilluinnartoq.
Kommuneqarfik Sermersooq taama tusagassiuutinut nalunaaruteqarpoq.
AAMMA ATUARUK Asii: Doris kukkuvutit
Misissuinerup takutippaa, kommunimi sulisut 91 procentii Kalaallit Nunaanni inunngorsimasuusut, aamma 96 procentii nunaqavissuusut.
Aammattaaq atorfiit qaffasissut tikisitanik taamaallaat inuttalerneqartarnerannik oqarneq ilumuunngilaq.
Misissuinerup takutippaa, sulisut 88 procentii sivisuumik ilinniagaqarsimasuusut tassaasut nunaqavissut, taakkunanngalu 92 procentit akunnattumik sivisussusilimmik ilinniagaqarsimasut.
AAMMA ATUARUK Suliffeqarfissuit Doris tunngavissaqannginnerarpaat
Kommuneqafik Sermersuumi sulisut Kalaallit Nunaannut qanoq attuumassuteqarnersut aatsaavissuaq misissuiffigineqarpoq, misissuinerullu inernera borgmester Asii Chemnitz Narupip naammagisimaarluarpaa.
- Atorfiit taama amerlatigisut nunaqavissunik inuttalerneqarsimaneri takullugu nuanneqaaq, pingaartumik qanoq piginnaasaqarneri isiginiarneqartarnerat eqqarsaatigalugu”, Asii Chemnitz Narup oqarpoq.
Borgmesterilli Doris Jakobsenip saassussinera naammaginartinngilaa:
- Nunatsinni qineqqusaartoqarnerani politikkikkut saassutarineqartarnerput avaqqukkuminaatsuusoq ilisimavarput, nunatsinnili qaffasinnerpaamik inissisimasussatut qineqqusaartoq isummanik pigiliutiinnakkanik tunngaveqarluni qineqqusaarnera pakatsissutigaara, Asii Chemnitz Narup allappoq.
AAMMA ATUARUK Doris Jakobsenip brugsenimut uparuaanera annertuumik akerlilerneqarpoq