Sermersooq Bornholmimi isumassarsiortoq
Kommuneqarfik Sermersuup inuussutissarsiutinut ataatsimiititaliaa Bornholmimut paasisassarsioqqammerpoq. Bornholmimi nioqqutissianik angivallaanngitsunik maannakkut tunisassiorluartoqartorujussuuvoq, tamannalu aningaasarsiornermut tunngaviulluinnartuulluni.
Ataatsimiitaliallu ilaasortaasa tamanna isumassarsiaqarfigivaat kommunimilu atorsinnaasoralugu. Bornholmimili isumassarsiarineqarsimasut Kommuneqarfik Sermersuumi siunissami atorneqarsinnaanersut apeqqutaaginnassaaq.
- Qularutissaanngilaq nioqqutissianik angivallaanngitsunik iluatsittumik tunisassiortut tassaammata inuit suliaminnut tunniussimalluarlutik suliaqartuusut. Ilisimalluinnarpaat pisortatut ingerlaannaq aningaasarsiaqalernaviaratik. Takuara ataasiinnaq inuussutissarsiutigissallugu naammanngitsoq.
- Tunisassiarineqartut naammaginartumik aningaasarsiutigineqassappata inuussutissarsiutigineqartut arlariisillugit pineqartariaqarput, Kommuneqarfik Sermersuup inuussutissarsiutinut ataatsimiititaliaata siulittaasua, Esmar Bergstrøm oqarpoq.
Bornholmimi inuussutissarsiutit ineriartortinneqarnissaat pingaartinneqartorujussuusimavoq, tamannalu tunngavigerpiarlugu Bornholmimiut maannakkut siunissagissaartorujusuupput. Nioqqutissiat amerlaqimmata sulisorisinnaasaat siunissami amigaataalertussaallutik.
- EU-mit 400 million koruunit tapiissutisiagut inuillu tunniusimalluarlutik sulerusunneri tunngavigalugit Bornholmimi inuussutissiorneq pitsaasumik tunngavilerneqarpoq.
- Angisoorsuunngitsunik suliffeqarfeqarpoq nioqqutissianik angivallaanngitsunik tunisassiaqartartunik, soorlu immiaaqqanik, snapsinik, honninginik lakridsinillu. Suliassarsiortarnertik pikkoriffigivaat. Nioqqqutissiat ilaat allami inerlugit suliarineqartussat Bornholmimi suliarineqartarput.
- Tuniniaanissamut suliniuteqarnitsinni – nioqqutissanik pilerisaarisarnissamut Business Center Bornholm ikiortigilluarsimaqaarput. Nioqqutissiortulli namminneerlutik tuniniagassatik pilerigisaarutiginiartarpaat, Bornholmimi suliffissaqartitsiarnermut ataatsimiititaliami ilaasortaq Martin Steen Jørgensen, V, oqaluttuarpoq.
Nioqqutissiortut pisisartutik isiginnaartoralugit tuniniakkaminnik pilerisaarisarpullusooq. Suliffeqarfinnik pilersitsisimasut tamarmik nioqqutissiaminnik suliffeqarfimminni, nioqqutissiap suliarineqarfiani tuniniartarpaat. Taamaalilluni pisisartut nioqqutissiat pisiarilertinnagit - qanoq suliarineqarneri isiginnaareersimallugit pisiarisarpaat.
Igalaaminiliortoq suliarisimasani takutissiariutigalugit igalaaminernik assigiinngitsunik nioqqutissiortarpoq, sikut sukkulaallu peqqissaruteqqissaarlugit pisiniartut mamarinnerpaseqisut isiginnaartoralugit nioqqutissiortarluni.
- Pilersitsinermi iluatsittumi ataatsimoorsinnaaneq, suleqatigiinneq, imminnut ussassaareqatigiinneq, ilisimasanik misilittakkanillu paarlaasseqatigiinneq pissutaapput. Inuussutissarsiortut imminnut suleqatigiittutut isigisariaqarput imminnut unammillertutut isiginatik. Bornholmimi pilersitsisut nioqqutiminnut aaqqissuussamik ussassaarinissamut periusissiorsimapput. Taamaalillutik imminnut niuernerup iluani nukittuutut inissisimatilerlutik, immikkuualullutik ingerlasimagunik taamaakkunnaratik, Esmar Bergstrøm oqarpoq.
Kommuneqarfik Sermersuup inuussutissarsiutinut ataatsimiitaliaani ilaasortat angalaqataasut tassaapput Esmar Bergstrøm, siulittaasoq/Nuuk, Søren Lyberth/Paamiut, Gert Ignatiussen/Tasiilaq, Martha Abelsen/Nuuk aamma Ane Egede Mathæussen/Nuuk.
