Sermersooq ajornermik pissarsivoq
Naalakkersuisut suliffissaarusimanermik akiuiniarnermi aningaasat qanoq agguarneqarsima-nersut tallimanngormat tamanut saqqummiuppaat. Tamanna Sermersuup borgmesterianut Asii Chemnitz Narupimut nutaarsiassartaqangaanngilaq, pakatsinarlunili.
- Uppernarsivara aallaqqaammulli siunnersuut equngareeqisoq allanngortinneqangaarsimanngitsoq, oqarpoq.
Kommuneqarfik Sermersuup suliffissaaleqisumut ataatsimut 27.000 koruunit pissarsiarai, Kujalleq suliffissaaleqisumut ataatsimut 44.000 koruuninnattoq, Qeqqata Kommunia 42.000-innalluni Qaasuitsullu Kommunia 33.000 koruuninnalluni.
- Suli tupigusuutigaara Naalakkersuisut isumaqarmata Nuummi suliffissaaleqinermik akiuiniarneq kommuunit sinnerinut sanilliullugu taamatut akikinnerutigisoq, Asii Chemnitz Narup oqarpoq.
Aningaasat katillugit 174 miliuunit koruunit illoqarfinnut ataasiakkaanut agguaanneqarnerat suli tupinnarneruvoq.
Tassami Sermersuumi illoqarfiit annersaat Nuuk taamaallaat 13 millionit koruuninik pissarsivoq. Naalakkersuisut namminneq naatsorsuutaat naapertorlugit millionit koruunit atorneqartut tamarmik ukioq ilivitsoq suliffissamik ataatsimik pilersitsisinnaassapput. Tassalu imaappoq immikkut iliuuseqarneq tamanna Nuummi suliffissaaleqisut 990-iusut akornanni inuit 13-it suliffissaannik pilersitsinermik kinguneqassaaq.
Aningaasanik agguaassinissaq aningaasaqarnermut ataatsimiititaliami suliarineqarmat isumaqatigiittoqanngilaq. IA'p ilaasortaatitai pingasuusut isumaqarput misissueqqittoqaqqaartariaqartoq, Siumullu Atassutillu ilaasortaatitaasa sisamaasut tamatuma utaqqeqqaarneqarnissaa pisariaqanngitsutut isigalugu.
