Sermeq qupparujussuaqalersimavoq
Kalaallit Nunatta Avannaarpiarsuani sermeq, Petermann-ip sermianik taaneqartarsimagunartoq, annertoorujussuarmik quppaqalersimasoq qaammataasiamit assilisat ersersippaat. Ekstra Bladet-mi taama allaaserinnittoqarpoq. Quppaq kilometerinik aqqanilinnik takissuseqarpoq, ilimagineqarporlu ungasinngitsukkut aserorujussuassasoq.
-Sermeq 160 kvadratkilomeritut annertutigisumik ilanngarsinnaavoq, Kalaallit Nunaanni serminik alaatsinaattoq, nunanik ilisimatooq, Jason Box, Ohio State University-meersoq, oqarpoq.
Sermeq taama angitigisumik ilanngarpat imaappoq sermip pingajorarterutaa annaaneqassasoq. Sermeq 29 kvadratkilomerimik qaammat kingulleq ilanngarpoq.
Sermit taamarsuaq nungukkiartornerat ilisimatuut arlallit aarlerinartippaat.
-Sermeq avannamut illuariartortillugu – Petermannilu taama avannarpasitsigisumiimmat, ernumajartuinnarpugut, Waleed Abdalati Colorado-mi Ilisimatusarfimmeersoq, oqarpoq.