Serbiamiut tuusintilikkaat akerliussutsiminnik takutitsipput
Serbiami naalakkersuisut nunanik killernik qaninniartut akerliuffiginiarlugit inuit 100.000-it missaat Beogradimi katersuupput, sorsunnermilu pinerluuteqarsimasutut unnerluussaasup Radovan Karadzicip tigusaanera aamma akerliuffiginiarneqarpoq. Amerikamiut nutaarsiassaqartitsiviat AP taama allaaserinnippoq.
Politiit tuusintilikkaat aamma upalungaarsimatinneqarput. Inuiaqatigiissutsimik pingaartitsisut akerliussutsiminnik kingullermik takutitsimmata pissutsit taamanikkut ajuissimapput, tassa Beogradimi februaarip qaammataani taamanikkut paatsiverunnersuaqarmat.
Amerikamiut aallartitaqarfiat ikuallanneqarpoq, ujajaasoqarpoq, pisiniarfiillu aserorteriffigineqarlutik. McDonaldsip neriniartarfii taamanikkut aamma saassunneqarput.
Kosovap namminersortunngorneranik USA-p tapersersuinera akerliuffigineqarpoq, inuillu kamassimaqalutik.
Radovan Karadzic ukiuni 13-ini ujaarineqareerluni sapaatip-akunnerup siuliani tigusarineqarpoq, sorsunnerullu nalaani pinerluuteqarsimasut eqqartuunneqartarfiannut Haagimiittumut tunniunneqarluni.
