Serbiamik assuiarinnittut amerliartorput

Serbiap illoqarfiisa pingaarnersaanni nunat arlallit aallartitaqarfii ippassaq aserutiteriffigineqareernerisa kingorna Serbiamik assuarinnittut amerliartuinnavipput.
februaarip 22-at 2008 13:31

Ilimagineqarpoq Serbiami politikerit nuimasut inunnik puffassaaqataasimassasut.

Naalagaaffiit Peqatigiit isumannaallisaaqatigiivisa Serbiami perulluliornerit sakkortuumik assuaraat. Nunat assigiinngitsut aallartitaqarfiisa, inniminarnerpaatut isigineqartut aserortigiffigineqarneri pillugit USA aamma assuarinnippoq.

EU-miit assuarinnilluni nalunaarummi ilangullugu oqaatigineqarpoq perulluliornerit EU-p Serbiallu akornanni pissutsinik innarliisinnaasut. Nalunaarusiani arlalinni allaaserisat naapertorlugit USA-p aallartitaqarfia saassunneqarmat politiit qanoq iliuuseqarsimanngillat, nalunaarusiamilu ataatsimi allaaserisat naapertorlugit USA-p aallartitaqarfia saassunneqarmat politiit qimagukkallarsimasut aatsaallu aallartitaqarfik sequtseriffigineqareermat utersimallutik.

Pasitsaanneqarpoq politikerit nuimasut perulluliortoqarnissaa iluariinnaraat, perulluliortummi annerusumik assuarineqanngillat. Serbiami naalakkersuisut siulittaasuat, Vojislav Kostunica oqarpoq; perulluliorniartartunik nunanit allanit taaniarneqartut inuttut pisinnaatitaaffimminnik illersuiinnartut. Kostunicami isumaqarpoq Kosovop naalagaaffittut namminersulernera inatsisaatsuliornerusoq, taamaammallu nunami tamani ippassaq akerliussutsimik takutitsisoqarnissaanik kaammattuisimalluni tassalu Beogradimi akerliussutsimik takutitsisoqareermat ingerlaaqataasut ilaat nunat allat aallartitaqarfiinik saassusseqattaalerput.

Naalakkersuisunut ilaasortat ilaat oqarpoq: ”Nunat allamiut naalagaaffipput sequmippaat ilaasalu aallartitaqarfiisa igalaavi aserorterpavut. Tamakku, tassa nunani allamiut, ilikkartariaqarpaat demokratiimik ingerlatsineq aamma taamatut ersersinnaasoq”.