Siusinnerusukkut Bosniami sakkutuut naalagaat sorsunnermi ajortuliani pillugit ukiuni 34-ni parnaarussassatut ullumi eqqartuunneqarpoq. Aatsaat taama sakkortutigisumik Bosniami eqqartuussivimmi pineqaatissiisoqarpoq.
52-inik ukiulik Gojko Jankovic unnerluussutini arfineq-marlunni pisuutinneqarpoq, tassa Bosniami 1992-imiit 1995-imut inuiannik allanik nungusaalluni sorsunnermut atatillugu suliarisimasai pillugit. Jankovic pisuutinneqarpoq arlaleriarluni pinngitsaaliilluni arnerisimasutut, toqutsisimasutut aamma niviarsiaqqanik allaat aqqaneq-marlunnik ukiulinnik “atoqatigisartagassaminik inussiaateqartarsimasutut”.
Jankovic sorsunnermut atatillugu pinerluuteqarsimasut qulingiluaasut Haagimi sorsunnermi pinerluuteqarsimasunut eqqartuussivimmit Bosniami eqqartuussassanngortinneqartut ilagaat.
Jankovic-ip pineqaatissinneqarnini eqqartuussivimmut qulliunerusumut ingerlateqqinniarpaa.