Serbiami præsidentimut qinersinerup immikkoortuata aappaa ingerlanneqarpoq
Serbiami præsidentimut qinersinerup immikkoortuata aappaa ullumikkut ingerlanneqarpoq, qinersinerlu nunap taassuma nunanut Balkaninut ilaasup Europamut attaveqarneranut Kosovo-llu siunissaanut aalajangiisuussaaq.
Præsidentinngorniunnermi naligeeqalutik unammisut tassaapput maanna præsidentiusoq nunanut killernut inussiarnersoq Boris Tadic aamma inuiaassutsimik pingaartitsisoq Tomislav Nikolic, qinersinerup immikkoortuani siullermi, sapaatip akunnerisa marluk matuma siornagut ingerlanneqartumi 5 procentinik amerlanerusunik taaneqartoq.
Qinersinerup immikkoortuani siullermi qinersisartut 60 procentiinnaat qinersiartorput, præsident Tadic-illu ullumikkut amerlanerusut qinersiartornissaat kissaatigaa, qinersinerlu Serbiap siunissami aqqutissaanik innuttaasut taasinerannik taallugu.
Qinersineq nunap immikkoortuani, Serbiap kujataaniittumi Kosovo-mi pissanngatigineqaqaaq, nunap immikkoortuata ilaa tamanna 1999-imi sorsuuttoqareersorlu Naalagaaffinnit Peqatigiinnit akisussaaffigineqalerpoq.
Tadic-ip Serbiap EU-mut NATO-mullu ilaasortanngortinnissaa sulissutigaa, tamannali akerliata inuiaassutsimik pingaartitsisup akueriumanngilluinnarpaa. Kosovop namminersortunngornissaa qineqqusaartut marluullutik akerleraat, tassami Serbiamiut nunap immikkoortua tamanna oqaluttarisaanerminnut kulturiminullu pilerfiusutut isigisaramikku.