Serberit akornanni naammagittaalliorneq annertusiartorpoq

Kamanneq minnerunngitsumik EU-mut sammitinneqarpoq. Serbiap ilaanni akerliussutsimik takutitsisut EU tiguaaniaasutut nalilerpaat, ilaasalu Ruslandimit ikiorneqarnissartik piumasaralugu, tassami Kosovop avissaarnissaanut Rusland akerliummat.

Akerliussutsimik takutitsinerup tamatuma eqqissiviilliornermik pilersitsisinnaanera annilaanngatigineqarpoq ilaatigut pissutigalugu Serbiap illoqarfiisa pingaarnersaanni Beogradimi ippassaq annertuumik akerliussutsimik takutitsisoqartillugu paatsiveerutaasartoqarmat. Tamatigut tamaana saassussisoqartarpoq annertuunilli ajoqusertoqarani. Tamanna ersiutaavoq nunat tamalaat FN-imi EU-milu sinniisui maaniittut serberinit kiffatut isumaqarfigineqarmata serberinullu pitsaanngitsumik iliorsorineqarlutik.

Kosovo ullumikkut aamma EU-mi oqaluuserineqassaaq. Tamatuma isumaqatigiissutiginiarnissaa ajornakusoortutut isikkoqarpoq. Nunat arlallit soorlu Spania, Slovakia Cypernilu Kosovomik qanimut suleqateqarumanngillat, ilaatigut pissutigalugu taakkua namminneq inuiattut ikinnerussuteqarmata namminersulernissaannullu kajumissaarumanagit. Akerlianilli USA-p nalunaaquttap akunnerisa qassikattannguit matuma siornagut Kosovomiut Albaniamiullu avissaarnissaat akuersissutigai.