Seqummakut nassaat timmisartumeersuunngillat

Brasiliami paasiniaasartut Atlantikumi seqummakut ippassaq nassaarineqartut misissoreerlugit ullumi nalunaarput Air Francep timmisartuutaaneersuusinnaanngitsut. Brasiliami sakkutuut timmisartortartut ujarlertut ilaat oqarpoq, pallit umiarsuarni atorneqartartut ilaannilu timmisartuni aamma atorneqartartut nassaarineqarsimasut, kisiannili timmisartoq tammartoq tamakkunannga nassataqarsimanngitsoq. Immami orsugiak aamma takuneqartoq timmisartumit tammartumeersimassangatinneqaraluartoq aamma upperineqarunnaarpoq, minnerunngitsumik timmisartup tammarnerata nalaani spaniamiu timmisartup tammartup ingerlaviata eqqaatigoortoq oqarmat tamaani silaannarmi qaammaallattumik takusaqarsimalluni. Taamaammat timmisartup qaarsimanissaa ilimagineqaqqilerpoq. Brasiliami pisortat nalunaarput timmisartoq suli ujarneqaraluartoq, annassimasunilli nassaartoqarnissaa qularnarsilluinnartoq.

Timmisartumi ilaasut Brasiliami ippassaq eqqaaniarneqarmata, ilaasut ilaqutaasa ilaat peqataarusussimanngillat, ilaquttamik annassimanissaat suli neriuutigigamikku.