Seqinniarfik nuannassutigilerpaat

Kaperlareerluni seqernup uteqqinnerani aqagu sapaammi Ilulissani seqinniassapput. Sila ajunngeriarpat nalunaaquttap ataatsip missaani seqineq nueqqissaaq. Tamanna pereerpat kulturip illuani Sermermiuni qittannissaq tullinnguukkumaarpoq.
Allattoq Noah Mølgaard
januaarip 12-at 2013 08:25

Iluliarmiorpassuit aqagu illoqarfiup kujataatungaanut Pitoqqiup qaavanut pisuttuassapput seqerngup uternerani tikilluaqqusiartorlutik. Novembarip 26-iani seqineq killingusaamut tarrimmat kaperareerluni seqernup uternera tamatigut nuannaffiusarpoq.

Seqinniarfimmi erinarsuutit seqinermut tunngatitat illoqarfimmut utinnginnermi erinarsorneqartarput. Seqinniarfissiornerlu unnukkut kulturip illuani Sermermiuni nanginneqassaq assigiinngitsunik aliikkusersuisoqassammat.

- Paasisimavarput imigassartaqanngitsumik aaqqissuinerit assut soqutigineqartut. Aaqqissuussinerit taamatut ittut kulturip illuani pigaangata inuppassuit takkussortarput, timersortarfimmi kulturillu illuani Sermermiuni pisortaq Sven Damgaard oqarpoq.

Nipilersorlutik aliikkusersuisussat tassaapput: Kalak Jazz, TV3, Erneeraq Siegstad, erinarsortartullu piukkunnarluartoq Sandra kiisalu Baabi.

Perorsaanermik ilinniarfimmi ilinniartut tarrat atorlugit takutitassiamik aamma takutitsissapput.

- Siornatigut Sermermiuni seqinniarfissiortareerpugut inuillu utoqqarniit meeqqanut soqutiginnillutik takkussorluartarput, Sven Damgaard oqarpoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq