Seqinnersuusaami olivinisiorfik ulapiffiuvoq
Aasarisseruttorpoq, inuppassuillu sulinngiffeqaraluartut, Seqinnersuusaami olivin-isiortut ulappuseruttorput. Taama oqarpoq qaartiterisoq Jan Kristensen:
- Sulinerput nuannersorujussuusarpoq, silagillunilu periarmat, massakkut soorlu. Ullaakkut arfineq-marluk qeqqanooraangatta nalinginnaasunik qulingiluat tungaanut sulisarpugut, ilaanili ulapileraangatta isikkarnup (aqqarnup) tungaanut sulilluta, Jan Kristensen oqarpoq.
Feriartoqaraangat amigaateqartillutillu nammineq maskiinartunut tapiliuttarpoq, soorlu kingullermik ullut marluk ingerlaneranni 42 tiiminik sulisimavoq.
Naatsorsuutigaat ukiumut 1,1 mio. tons avammut tunisassallugu.
- Siullermik annertunerulaaraluarpoq, kisianni kinguaattuulaartalutalu pigatta angummakkiartorpugut. Kisianni tamaat isigalugu ajunngilaq, qaarterisoq oqarpoq.
Seqinnersuusaami “Seqi Olivin”-ip aatsitassassarsiornera ukiumut 1,1-1,5 mio. tonsinik qalluiffiussasoq naatsorsuutigigaanni, ilimagineqarpoq ukiuni 50-ini olivinisiortoqaannassasoq.
Olivinisiornerlu immap qulinnguani qatsiartumilu qaqqap qaani ingerlanneqartarpoq. Sulisullu imminnut ungasissumi sulisariaqartarput.
- Formandillu takananiittut suleqatigiittarpugut. Uanga maani minemi (assaavimmi) sprænglederitut qulaani sulineq aquppara. Rune Lisbergillu kanani qaqqulaarivimmi aamma umiarsuup aallersup immerneqarneranik sulineq isumagaa. Oqaloqatigiillattaarluta pisaratta ataqatigiissumik ullormiit ullormut sulineq ingerlasarpoq, Jan Kristensen erseqqissaavoq.
Sulisullu feriarnissaat pinngitsoorneqarsinnaanngilaq.
- Suu, feriartoqalaartorujuuvoq, uanga aamma feriangajalerlunga ulapippunga. Ferianngilaattaa una nikorfaffigisarput qaartittussaagatsigu. Kisianni feriap nalaa ajorneq ajorpoq. Allat takkuttarput. Sulineq uninneq ajorpoq feriartut pillugit.
Jan Kristensen qaartiterinermut pisortaq taama oqarpoq. Apersorneqarnermini taasaa Runi Lisberg qallunaatut radioavisimi apersorneqartoq tusaasinnaajumaarparsi.
Olivinisiorfik 2005-imi aggustimi ammarpoq, maannalu 40-nik sulisoqarluni.
