Misissuineq: Seqinermi pisoqarpiannginnera arsarnikinnerulersitsisinnaasoq
Tuluit ilisimatuut University of Readingimeersut misissuinerat taama inerneqartoq, Norgemi nutaarsiassaqartitsivik NRK taama nalunaarpoq.
Ilisimatuut seqerngup anoraasa milaasalu nikerartarnerat malinnaaffigisimavaat, naliliippullu ukiut untritillit maannakkut atukkatta qiteqqunneranni ukiut 300-it ingerlanerini seqerngup milai aatsaat taama nikeranngitsigissasut. Taamaaligunillu ukiuni 50- 60-ini taamaakkumaarluni.
Dr, Mathew Owens misissuinermik aqutsisuusimasoq NRK-mut allappoq ersarissumik siulittuuteqarsinnaanatik. Maannakkulli seqinermi pisoqarpiannginnera 1645-miit 1715-ip tungaanut pisimasumut assigusoq.
Ilisimatusarnerup inerneraa seqinermi pisoqarpiannginnerata kingunerisinnaagaa seqerngup nunarsuarmut illersuutaata sanngiillinera. Imaappoq seqerngup qinngorneri ulorianartut amerlissapput, tamakkulu atortunik eletroniskiusunik ajoqusiisinnaapput.
Aammalu issittup kujataaniittuni arsarnerit qaqutigoornerulerlutik.
