Seqi Olivinimik piginneqatigiissutit Minelcop tamakkerpai

Sverigemiut piginneqatigiiffiat Minelco Atammiup eqqani olivinnimik piaalluni qanittumi aallartissaaq.

Atammiup eqqani Seqi Olivine A/S-ip piiaanissaanut piginneqatigiissutit tamaasa Minelcop qanittumi pisiareqqammerpai. Minelcomi pisortaaneq Per Erik Lindvall taama ilisimatitsivoq.

Piiaanissamik pilersaaruteqarneq norgemiut canadamiullu piginneqatigiiffiata Crew Gold-ip isumassarsiaraa. Seqi Olivinemilu piginneqatigiissutit 51 procentii Minelcop siorna pisiarai, piginneqatigiissutillu tamarmiusut Minelcop massakkut pigilerpai.

Per Erik Lindvall-ip naatsorsuutigaa piiaanissamut piareersarneq olivinimillu piiaanissaq qaammammi uani aallartinneqarsinnaassasoq.

Minelcop naatsorsuutigaa olivin 120.000 tons ukioq manna piiarsinnaassallugu. Siunissaq ungasinnerusoq eqqarsaatigalugu Lindvall-ip ilimagaa, Atammiup eqqaani piiaavik 1-2 mio. tonsinik ukiumut piaaffigineqarsinnaassasoq.

Piiaaneq ukiuni 50-ini amerlanerusuniluunnit ingerlanneqarsinnaasoq Minelcomi pisortaaneq oqarpoq.