Seqernup tamakkerluni pulanissaa takorusukkukku billetsisereersinnaavutit

Radioaviisimi ukiut tallimat qaangiuppata aatsaat pisussanik pilerisaarisarnerput qaqutigoortuuvoq! Ullumikkulli pilerisaarilaaraluarutta ajornavianngilaq. Tassami marsip ulluisa 20-anni ukioq 2015 - ullumikkumiit ukiut tallimarpiaat qaangiuppata - Savalimmiuni seqineq tamakkerluni pulassaaq!
Allattoq Mads Lynge
marsip 20-at 2010 17:08

Radioaviisimi ukiut tallimat qaangiuppata aatsaat pisussanik pilerisaarisarnerput qaqutigoortuuvoq! Ullumikkulli pilerisaarilaaraluarutta ajornavianngilaq.

Tassami marsip ulluisa 20-anni ukioq 2015 - ullumikkumiit ukiut tallimarpiaat qaangiuppata - Savalimmiuni seqineq tamakkerluni pulassaaq!

Svalbardimi Savalimmiunilu seqerngup tamakkerluni pulanissaa nunamiit taamaallaat takuneqarsinnaassaaq ulloriarsiortullu nunarsuarmi tamaninngaanneersut Savalimmiuliarnissartik maanna pilersaarusiulereerpaat Atlantikumi qeqertaarannguani taakkunani pinngortitami pisoq malunnaatilik takuniarlugu.

Aammattaaq maani Kalaallit Nunaanni inuit ataatsimoortut amerlasuut Kalaallit Nunaanniit timmisartumik attartoriarlutik Savalimmiuliarnissartik pilersaarusiorlugu aallartippaat.

Arne Hermann Nuummeersoq siornatigut seqineq pulasoq takuniarlugu ilaatigut Kinamukarsimasoq kalaallinut takunninniartunut aaqqissuisuussaaq.

- Maani Nuummi angalatitsivik peqatigalugu angalanissaq aaqqissuutilerparput maannangaarlu tassa peqataanissamut allatsittoqarsinnaalerpoq Savalimmiuliarnissamut sapiissuseqaraanni. Akunnittarfik attaveqarfigereerparput nalunngilaralu Savalimmiormiorpassuit nunatsinniittut Kalaallit Nunaata Savalimmiullu akornanni timmisartumik attartorluni toqqaannartumik angalanissaq siullerpaaq qilanaarigaat.

- Seqerngup pulaneranik nuannarisaqaraanni taava ukiut tallimat qaangiuppata iliuuseqartariaqarpoq. Eqqaamiutsinni seqerngup tamakkerluni pulanissaa Illoqqortoormiini 2026-imi pisussaagaluarpoq, Arne Hermann naggasiivoq.