Seqernup pulanera nunarput tamakkerlugu ullaaq takuneqarsinnaavoq

Seqernup pulanera pillugu Qaanaameersumik, Qaqortumeersumik Nuummeersumillu apersugaqarpugut.
Allattoq Elisa Isaksen
aggustip 01-at 2008 09:02

Ilisimaneqareersutut ullaaq manna pinngortitami nalinginnaanngitsumik pisoqarpoq – tassa minutsit arlaqanngitsut qaangiupput, seqernup pulanermini pulanerpaaffissani angummagu. Nunatsinni sumiinneq apeqqutaatillugu – silallu qanoq innera apeqqutaatillugu – isigisaq alutornartoq, tassa qaammatip seqinermik assiinera isiginnaarneqarsinnaavoq.

Qaanaap avannaani seqernup tamakkerluni pulanera isiginnaarneqarsinnaavoq – maannalu Qaanaamiittoq Uusaqqak Qujaukitsoq oqarasuaatikkut attaveqarfigaarput – Uusaqqak Qaanaami qulisimagaluartoq, takusaqarsinnaavisi?

- Tassa qulisimagaluaratta, maannali tamakkiisumik pulanerata missarpiaani, nuissat akullaameriarmata maanna takusinnaalerparput.

Seqinermut isiginnaaruteqannginnatta immikkut nammineerluta sanariarluta nuliaralu isiginnaarparput. Pularuttornerata nalaani silap taarnerulaalernera malugisinnaavarput. Soorlu tamanna ilulissani avatitsinniittuni malugilluarsinnaavarput, Uusaqqak Qujaukitsoq oqarpoq.

Qaqortumi allaaqeqimmat seqernup pulanera isiginnaarneqarsimanersoq Lis Larsenimut apeqqutigaarput.

- Seqinermut isiginnaarutit atorlugit seqernup 50 procentiata missaa pulasoq takusinnaavarput. Inuit assut pissamaarlutik seqinermut isiginnaarutissaminnik ippassaq aalleqattaarput.

Nuummi pujoriarmat, seqernup pulanera takusinnaajumallugu Nuup akianut ikaarsimasumik mobiltelefonikkut attaveqarfigaarput Arne Hermann:

- Tassa massakkut Nuup Akiani Maalutumiippugut. Ippassaruna ullaarmanna Nuummi pujortussaasoq paaseriaratsigu suleqatigalu isumaqatigiikkatta kangerlummukarniarluta.

- Pulanerpaaffimminut pimmat seqinermut isiginnaarutit isumannaatsut atorlugit isiginnaarparput, alutornaqaaq. Aamma qaamaneq allaasoq malugisinnaavarput. Isiginnaarlugu alutornaqaaq, aammami qaqutigoortuugami, Arne Hermann oqarpoq.