Senatorit USA-meersut Ilulissaneeqqammerput
Senatorit USA-meersut qulit Ilulissaneeqqammerput, silallu kissatsikkiartuinnarnerata kingunerisaanik sermersuup aakkiartuinnarnera qanimut takuniarpaat.
Danmarkimi avatangiisinut ministeri Connie Hedegaard senatorinik qaaqqusisuuvoq.
Senatorit sermip uukkaavianut angalaartinneqarnerminni misigisaqarsimassaqisut avatangiisinut ministerip Connie Hedegaardip qularutiginngilaa:
- Senatorit takusimasatik tupigisarsimaqalugit oqaloqatigiittarnitsinni qasseerpassuariarlutik oqaatigisarpaat. Silalli allanngoriartorneranut atatillugu USA-mit maanna iliuuseqartoqassanersoq suli nalunarallarpoq, Connie Hedegaard nutaarsiassaqartitsivimmut Ritzau-imut oqarpoq.
Silap pissusaannut tunngatillugu Naalagaaffiit Peqatigiit Københavnimi 2009-mi ataatsimeersuassapput, senatorillu tikeraaqqammersut oqallinnermut peqataanerulernissaat neriuutigineqarpoq.
Inuit nuimasut Ilulissanut tikeraallattaaginnavipput, Tysklandillu kansleria Angela Merkel tikeraartussanut aamma ilaavoq. Taanna aggustip qaammataata ingerlanerani Ilulissiassaaq.