Senatorit: Canadap imartaani uuliamik gassimillu qillerinerit inerteqqutaassanngillat

Canadap naalakkersuisuini ataatsimiititaliaq senatimeersunik ilaasortaqartoq, nalunaarusiamik saqqummiusseqqammerpoq.

Canadap imartaani qillerinerit qannoq issusiannik misissuissanngorlugit ataatsimiititaliaq sulisinneqarpoq, Mexicop kangerliumarngani uuliasiorfiup ajutoornerat kingorna, ataatsimiititaliaq misissiuinissamik suliakkinneqarluni.

Canadap imartaani qillerinermi malittarisassat nunarsuarmi malittariassani sukannernerpaanut ilaapput, ataatsimiititaliap nalunaarusiaanni tamanna ilannguneqarpoq. Canadamiut uuliamik gassimillu qalluinerat isumannaatsumik ingerlanneqarnerat Canadamiunut

qulakkeerlugu oqaluttuarineqarnissaa atatsimiititaliap kissaatigaa.

Uuliamik gassimillu qillinerit unitsinneqarallarnissaannik unitsivinneqarnissaannilluunniit tunngaviusinnaasunik ataatsimiititliaq takusassaqarsimanngilaq.

Mexicop kangerliumarngani misilittakkat ilinniarfisimapput, tamakkulu nakkutigineqassapput nalilersorneqarlutillu, qillerinerit issittup imartaani manerasuup sineriaannut qanittuani, sinerissamiluunniit atlantikuut sineriaqartut pineqarpata, ataatsimiititaliap nalunaarusiaani tamaatut allassimavoq.

Ataatsimiititaliap siulittaasua senator David Angus ernumasoqartariaqanngitsoq oqaatigaa Canadamiullu ernumasariaqanngitsut oqarluni.

Ataatsimiititaliaq inunnik 26-inik tusarniaavoq. Tusarniarneqartut amerlanersaat suliffissuaqarfinnit naalakkersuisuniillu pisuunerat isornartoqartinneqarpoq, avatangiisit pillugit suliniaqatigiiffinnit nagguteqatigiillu inuit tusarniarneqarsimannginnerat isornartorsiorneqarluni.

Canadap issittortaata imartaani maannakkut uuliamik gassimilllu ujaasilluni qillerisoqanngilaq, Marianne Stenbæk Canadamiit taamatut tusarliivoq.