Senatimi amerlanerussuteqartut inatsisissaq USA-mi naalakkersuisut sulinerannik ammaaqqittussaq akuersissutigaat
USA-mi naalakkersuisut sulinerisa aatsaat taama uninngatinneqarnera atorunnaarsinniarlugu inatsisissatut siunnersuut Senatimi amerlanerussuteqartut akueraat.
Nutaarsiassaqartitsivik Reuters tusagassiuullu BBC taama allapput.
Siunnersuut 60-init akuerineqartoq 40-nillu itigartinneqarluni, BBC allappoq.
Inatsisissatut siunnersuut Senatimi akuerineqareerpat, præsidentimit Donald Trumpimit atsiorneqartinnagu USA-p sinniisoqarfiata ataatsimiittarfiani taasissutigineqassaaq.
USA-mi naalakkersuisut sulinerat ulluni 40-ni uninngatinneqarsimavoq, taamaalillunilu oqaluttuarisaanermi aatsaat taama sivisutigisumik uninngatinneqarsimalluni.
Pisortani sulisut tusindillit akissarsiaqaratik angerlartinneqarsimapput. Tamatuma saniatigut uninngatitsineq USA-mi timmisartuussinernut, nerisassanik ikiuinermut nunanullu allanngutsaaliukkanut sunniuteqarpoq.
Aappaagumut nerisassanik eqqanaarsartut
Ukiup aningaasaqarfiusup oktobarip aallaqqaataani naannginnerani, missingersuutinut inatsisissaq nutaaq Demokraatit Republikanerillu isumaqatigiissutigisimanngimmassuk, tamanna matusinermik kinguneqarpoq.
Senatorit pingasut Angus King, Jeanne Shaheen aamma Maggie Hassan, inatsisissat pillugit Demokraatit sinnerlugit Republikanerinik sapaammi isumaqatiginninniarsaripput, tamannalu senatimi marlunngornerup unnuaani oqallisigineqarlunilu taasissutigineqarpoq.
Reuters naapertorlugu, inatsisit sapaammi isumaqatigiissutigineqartut, januaarip 30-ata tungaanut naalakkersuisunut aningaasalersuisuussapput.
Aaqqissuussami SNAP-imik taaneqartartumi nerisassaqartitsiniarluni ikiuinerup — siornatigut nerisassanut akiliutissatut ilisimaneqartunik — septembarip 2026-ata tungaanut ingerlaannarnissaa isumaqatigiissummi qulakkeerneqartoq, Reuters allappoq.
Inatsisit Senatimi akuersissutigineqartinnagit inatsisartut pingasunngorpat taasitinneqarumaartut, Repræsentanternes Hus-imi siulittaasup, Republikaneri Mike Johnsonip neriuutigaa.
/ritzau/
