Nunatsinni angutit isikkamik arsaallutik pissartanngornerat nangillugu Nuup arsaattarfiani ualeru pissartanngorniutivinnernut anngunniuttoqassaaq.
Ippassaq unamminerni semifinalinut annguttuupput ukuusut.
K-33 Kugsak 45-mut 1-0-imik ajugaavoq, taamalu Pulje 2-mi K-33 siuttunngorpoq, Kugsak 45-lu puljeqatiminni angusarissaareerami semifinalinut aamma annguppoq.
Unamminerit aappaanni Nagdlúnguaq N-48 aamma Kâgssagssuk naligiipput 1-1-ramik. Pulje 1-imi taamaalillutik Kulusummeersut TM-62 siuttuuginnarput, semifinalinullu Nagdlúnguaq annguteqataavoq.
Angutit arsaallutik semifinalernissaat ualeru nalunaaqutaq tallimanut aallartissapput, siulliullutik arsaatissallutik TM-62 aamma Kugsak 45.
Nalunaaqutaq arfineq-marlunut K-33 N-48-lu unammissapput.
Arsaannerit taakku KNR TV-kkut toqqaannartumik aallakaatinneqassapput.
Pissartanngorniutivinnerillu arfininngorpat ingerlanneqassapput, marlunut tre-nngorniunneq sisamanut finali.