Isikkamik arsaalluni GM Semifinalertussat inissipput
Ullormut unammeqqaartut tassapput FC Malamuk Uummannameersoq aamma SAK Sisimiuneersoq, unamminerlu holdinut taakkununnga pingaaruteqartorsuunngilaq.
Pingaannginnerusumik inissitsitertussaapput unamminissarlu SAK-miunut ajornarpallaanngilaq, 2-0-millu aamma ajugaapput.
Sisimiormiut inuusuttut nukissaqarnerulaarnertik atorluarpaat FC Malamummiullu pointinnanngitsoorlutik angerlaannartariaqarput.
AAMMA ATUARUK Semifinalimut ingerlaqqittussat ilaat paasinarsipput
K-33-miut ataasiarlutilluunniit ajugaanatik angerlaannartariaqarput
Ullormut unamminerit aappaanni K-33 Qaqortumeersoq aamma B-67 Nuummeersoq unammipput. Unammineq taanna aamma pingaaruteqanngilaq. K-33 angusassaqarani nersorneqaatissani kisiat pillugu unammivoq.
B-67-ip sillimmatini tamaasa unammitippai ilungersungaaranilu 1-5-imik ajugaavoq.
B-67 pisassaanngilaq. K-33-miut ataasiarlutilluunniit ajugaanatik angerlaannartariaqarpoq.
Qasigiarmiut gruppiminni nr. 1-inngorput
Ullormut unamminerit pingajuanni Kugsak-45 Qasigiannguaneersoq aamma G-44 Qeqertarsuarmeersoq unammipput.
Unamminerat aliikkutaalluavippoq Qasigiarmiut Qeqertarsuarmiullu tapersersuiniarlutik isiginnaariat amerlaqalutik. Unammineq nuannersoq arsarluarfiusorlu.
G-44 unamminerup immikkoortuani siullermi 0-1-imik siuarpoq, unamminerulli immikkoortuata aappaani Kugsammiut uummaarinnerulerlutillu saassussiumatunerulerput G-44-lu tatineqaleraluttuinnarpoq tamannalu kinguneqarluarluni.
G-44-miut ajornartoorlutik tamaviaalerput, Qasigiarmiunulli 1-1-imut ajuunnermik kingorna isiginnaartunit tapersersorluarneqartunut soriarsinnaajunnaartutut-ilipput.
Tassanngaanniillu qularnarunnaarpoq. Kugsammiut 2-1-imik siuaqqalernerisigut ajugaanissaat ilimanarsivoq unamminerullu immikkoortuata aappaata qiteqqunnerani ajuuteqqipput 3-1-imik siuaqqalerlutik, unamminerlumi taama inerneqarpoq.
AAMMA ATUARUK GM-ip ulluani siullermi målernerpassuit
IT-79 pisassaanngilaq
Unamminerit sisamaanni kingullersaannilu IT-79 Nuummeersoq aamma T-41 Aasianneersoq unammipput, unamminerlu taanna pissanngatigineqarluarpoq semifinalimut anngunniarsarisoqartussaammat.
IT-79-kkormiulli unammineq sukkasuupilussuarmik tiguaqqasuusiinnarpaat taamaattumillu pissangartoqarpallaarunnaarluni. IT-79 3-0-imik ajugaavoq.
Semifinalimut annguttut tassaapput: K-45 Qasigiannguaneersoq, G-44 Qeqertarsuarmeersoq, IT-79 Nuummeersoq B-67-ilu aamma Nuummeersoq.
Ullumikkut sisamanngornermi unammisoqassanngilaq, tallimanngorpallu unammisussat tassaapput B-67 - G-44 aamma IT-79 - K-45. Unamminerit taakku KNR TV-kkut aallakaatinneqarumaarput.