Semifinaalit pissanganarluinnartut
Semifinaalimut anngunniuunnerit marlunngornermi naammassipput. Pulje 1-imi B-67 Nuummeersoq unamminerni pingasuni ajugaaginnavilluni ingerlaqqippoq, taamatullu IT-79 aamma Nuummeersoq ingerlaqqilluni.
Pulje 2-mi Iluliarmiut N-48, ukioq kingulleq sølvinnattut G-44 semifinaalimut ingerlaqqipput.
N-48 unamminerni pingasuni 25-inik isertitsinikuupput arfineq malunnillu isertitsiffigitinnikuullutik. Taakku ajugaasussatut ilimanaateqarlutik IT-79 semifinaalimi unammissavaat. IT-79 aqqanileraarnikuupput tallimariarlu isertitsiffigineqarnikuullutik.
B-67 puljamini ajugaaginnavikkaluarluni pisarnermisut nukittutigerpasinngilaq. Saassusisarnerminni iluatsippallaarneq ajorput. Pingasoriaq unamminerminni qulingiuaraarput, taakkunani arfinillit unamminermi kingullermi isertillugit. Taamaakkaluartoq kinguarsimasuginnerpaagallarput tassami ataasiaannaq isertitsiffigineqarnikuugamik.
G44 - B67 Sisamanngorneq nal. 17.00
N48 - IT79 Sisamanngorneq nal. 19.00
John L. Broberg, ukioq manna meeraallunili klubbimini G-44-mi arsaqataaniarluni aalajangersimasoq, arsaaffiup qeqqani unammisartoq B-67-ip amigaatigerpasippaa.
John L. Broberg pissartanngorniuunnermi matumani arsarluaqaaq. TAanna N-48-mut unamminermi pingasoraarpoq ataasiarlu målertitsilluni. Qularnanngitsumik G-44 sinnerlugu B-67-imut unammileruni pingaaruteqarluinnartutut inissisimassaaq.
Semifinaalernerit sisamanngornermi KNR-TV-kkut toqqaannartumik malinnaafigineqarsinnaassapput.
AAMMA ATUARUK Qeqertarsuarmiut ajugaasut
AAMMA ATUARUK B-67 vandt GM i høj sol
