Seeqquluttut siffialuttullu utaqqisut 250-iupput
Maannakkorpiaq utaqqisut 250-iupput, 26 miliuuninilluunniit peqqinnissaqarfik taperneqaraluarmat utaqqisut ikiliallassangatineqanngillat. Dronning Ingridip napparsimavissuani nakorsaaneq, Jacques Funding taamatut oqarpoq.
Jacques Funding oqarpoq, tapiissutit atorlugit ullumikkut ingerlanermittut ingerlaannarsinnaanertik qulakkeerneqartoq, saniatigullu allanik suliaritittussanik tigusisinnaanermik tamanna kinguneqanngitsoq. Aggustimilu tapiissutit nunguppata ullumikkut atugassarititaasut uterfigineqaannartussaassasut.
Sulisorisinnaasat tamaasa sulisoritillugit, seeqquluttut siffissamikkullu suliaritittussat 80-it ukiumut SANAmi suliarineqarsinnaasarput. Maannakkorpiarlu seeqqumikkut suliaritittussat 200-t siffissamikkullu suliaritinnissaminnut utaqqisut 50-it utaqqisuniipput, taakkualu ikiliartoratik. Taamaammat pissutsit taamaatsillugit utaqqisut ilaat suli ukiuni arlalinni utaqqisariaqassapput.
Ajornartorsiutit qaangerniassagaanni allatut ajornaqaaq taava utaqqisuniittut nunanut allanut, soorlu Danmarkimi napparsimmavinnut namminersortunut suliaritikkiartortariaqassapput, taakkununngalu aningaasartuutissat aamma nassaariniarneqartariaqassapput, Jacques Funding oqarpoq.
