Inuussutissarsiornermut, nukissiuuteqarnermut, ilisimatusarnermut suliffeqarnermullu naalakkersuisup, Jess Svanep, pingasunngornermi pisussat oqalugiarluni aallarnerpai.Assi: Merete Lindstrøm

Science Week Nuummi perngaammik ingerlanneqaleruttortoq

Science Week, inuit 220-t nunanit assigiinngitsunit 15-ineersut peqataaffigisaat decembarip aallaqqaataanit tallimaanut 50-init amerlanerusunik aaaqqissuussaqarfiuvoq.

Nuuk sapaatit akunneranni uani pisumik perngaammik Science Weekerfiuvoq.

Qulequttat 50-init amerlanerusut inunnit 220-nit nunanit assigiinngitsunit 15-ineersunit decembarip aallaqqaataaniit tallimaata tungaanut sammineqarput. Aaqqissuussaq Science Week Connecting Communities and Sciencemik – tassa nunagisami innuttaasunik ilisimatusarnermillu ataqatigiissitsinermik qulequtaqarpoq.

Inuussutissarsiornermut, nukissiuuteqarnermut, ilisimatusarnermut suliffeqarnermullu naalakkersuisup, Jess Svanep, pingasunngornermi pisussat oqalugiarluni aallarnerpai.

Naalakkersuisup nunatsinni ineriartorneq, innuttaasut inuussutissarsiornerlu eqqarsaatigalugit nunatsinni ilisimatusarnerup pingaaruteqassusaa erseqqissarpaa.

Nunat inoqqaavisa ilisimasaat ilisimatusarnermi qanoq atorneqarsinnaaneranik ullup ingerlanerani saqqummiisoqarlunilu ilisimatusarnermi nunagisami innuttaasunik suleqateqalersinnaaneq pillugu oqallittoqarpoq. Kalaallit Nunaanni Silap Pissusianik Ilisimatusarfik silallu pissusianik paasissutiseeriaaseq pillugit aamma saqqummiisoqarpoq.

AAMMA ATUARUK Issittumi Ilisimatusartut nunatsinni ataatsimeersuarngaalersut

Inuusuttut ilisimatusartut tallimat ph.d.-nngorniutiminnik sisamanngornerup ualiani saqqummiissapput. Taakkua nerisassat akuiniit Kalaallit Nunaanni inuunerissutsimut aammalu politikerit meeqqat atuarfiisa aningaasaqarniarnerisigut qanoq pingaarnersiueriaaseqarnerannut tunngasunik saqqummiissapput.

Sisamanngornermi aaqqissuussat peqataajartortunut 220-usunut tunngasuupput, tallimanngornermili pisussarpassuit kikkunnilluunniit peqataaffigineqarsinnaapput.

Nalunaaqutaq quliniit unnukkut arfineq-marluk tungaannut oqalugiarluni saqqummiisoqartassaaq, ilisimatusarnerup ataqatigiissagaaneranik takussutissianik saqqummiisoqartassaaq Katuamilu kikkunnulluunniit ammasumik saqqummersitsisoqassaaq.

Innuttaasut Kalaallit Nunaanni Issittumilu ilisimatusarnerit pillugit paasisaqarnissaat aaqqissuussinermi anguniagaavoq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat