Schweiz-imiut Qeqertarsuup ernganik tunisassiulerput

marsip 02-at 2006 16:00

Schweizimiut aningaasaliissuteqartarfiat ThoCon 300 mio. koruuninik aningaasaliissuteqarluni Qeqertarsuarmi Uunartuarsuup ernganik tunisassiulernissaa Naalakkersuisunit ullumi akuersaarneqarpoq. Qeqertarsuulli borgmesteriata Augusta Sallingip tamanna isumaqatiginngilluinnarpaa.

- Oqaatigisariaqarpara soorunami pakatsissutigaara Qeqertarsuup kommuniata allanik soqutigineqanngilluinnartoq suliaq ingerlannikuuaa, taavalu ukiuni kingullerni suliaq ingerlaqqinniassammat SIK Pilersuisorlu suleqatigalugit aamma naalakkersuisuninngaanniit kaammattuineq tunngavigalugu pilersaarut taanna ingerlanneqarsimavoq, aningaasarpassuillu taakku suleqatigiit atorsimavaat qinnuteqarnissamut toqqammavissat qulakkeerniarlugit. Piareermat avataaninngaanniit soqutiginnittut aningaasaaterpassuaateqarlutik takkummata taakkua soorunami qinerneqarnerat pakatsinarpoq. Ugguunaatigut immaqa oqartoqarsinnaagaluartoq suliffippassuit aap qujanaq! Kisianni qaqugu Kalaallit Nunaani naqqaninngaanniit piorsaalluta immitsinnut tatigaluta piorsaasinnaanissarput aallartissinnaalissavarput? Ilaa naqqaninngaanniit pilersitsiniarlutik suliaqarsimasut taamatut illikartiinnartassagutsigit soorlu massakkut pisoqartoq. Taamaattumik isumaqarpunga nunatsinni immitsinnut sapertutut isigiinnarnata aamma naqqaninngaanniit piorsaarusullutik perusussusillit taakku periarfissisinnaalertariaqarpavut, Augusta Salling oqarpoq.

Avataaneersut Qeqertarsuup ernganik tunisassiortussanngormata borgmesteri Augusta Salling illuatungaatigut imaattumik piumasaqarumavoq.

- Piumasarissavarput suliffiit pioreersut taakkua innarlernagit assersuutigalugu Royal Greenlandip avaleqqanut suliffeqarfiutaa, taanna unitsinneqassanngitsoq, sulisut tassani imermut tunisassiortussanngorlugit nuutsinneqassanngillat tassami Qeqertarsuup kommuniani suliffiit taakkua pioreermata, Augusta Salling oqarpoq.

Suliffiit 60-t Qeqertarsuarni naatsorsuutigineqarsinnaalernerat borgmesterip qujaruppai, ukiulli ataatsip ingerlanerinnaani illorpassuit sanaartorneqartussanngussapput, tikittussat inuppassuussammata ilaqutaqassallutillu. Qeqertarsuulli illuliortiterneq nammassinnaanngikkaa naalakkersuisut naatsorsuutigissagaat erseqqissaatigaa.

- Aningaasaatilissuit aningaasaliissuteqartullu aalaniartoqapallattassappat taava kikkut kalaallit naqqaniit aallartitserusussagamik, Augusta Salling oqarpoq.