Savissivimmut juullisioriat aatsaat apuupput

Silap ajornera, Air Greenland-illu helikopteriata motooriminik ajoquteqalernera pissutigalugu juullimut tunissutissat angalasullu Avanersualiat aatsaat ippassaani apuussinnaasimapput.

Air Greenland-imi angallannermut pisortap Jørgen Erik Andersen-ip oqaatigaa avannaarsuani timmisartuussiniarneq imaannaaneq ajortoq. Mittarfeeqqat sumiissusersiutinik atortorissaaruteqanngimmata isikkivikkaangat aatsaat timmisinnaasarput. Kaperlannerattaarlu angallannermut akornutaavoq.

Pituffimmi politiit pisortaat John Hansen oqaluttuarpoq juullimut tunissutisiassani ippassaq aatsaat tigusimallugit.

Thomas Suersaq Savissivimmut juullisioriartoraluartoq oqaluttuarpoq Qaanaami Pituffimmilu ulluni 20-ni saperngusimalluni.

- Januaarip 22-ianili Qaanaaminngaanniit aallartussaagaluaratta, aatsaat ippassaani Januaarip 11-ani Savissivimmut tikippugut. Qujanartumik Qaanaami ilaqutaqaratta ikinnguteqarlutalu, tassa Savissivimmi juullisiortusaagaluarluta Qaanaami juullisiorpugut.

Taama oqarpoq Thomas Suersaq.

Ilanngutassiaq Nive Nielsen-imik suliarineqarpoq.