Savissivimmiut puijungaasutut misigisimapput
Qanaap nunaqarfiani Savissivimmi najugaqartut puigukkatut misigisimapput. Nunaqarfik piffissami sivisuumi inuussutissanik pilersorneqanngilaq Savissivimmiullu pajunneqalaarnissaminnik kissaateqartarnerigaluat maanngaannaq aanngartarpoq. Qaarngaaq Nielsen radioavisimut oqarpoq massakkut niuertarfitsik inuussutissanik mamakujuusinnaasunnguanillu imaarussimasoq, oqarfigineqarsimallutillu augustip qulingiluaanni pajunneqarnissartik aatsaat naatsorsuutigisinnaagitsik. – Sapaatip akunnerata siuliani qerisumininnguit helikopterip tikiummagit nuannaarpugut, naak qerisut akisugaluaqisut ullussaallu qaangiutereersimagaluartut, Qaarngaaq Nielsen oqarpoq. Qaarngaaq Nielsen aamma oqarpoq ukiuni kingullerni Savissiviup nioqqutissanik pilersorneqarnera ajorsigaluttuinnarsimasoq nioqqutissallu akittoraluttuinnarlutik. – Ajorluinnarpoq puigorneqarsimasutut misigisimaqaagut, Qaarngaaq Nielsen oqarpoq. Qaanaaq pigisaalu Upernavimmi Pilersuisumit pilersorneqarput. Upernavimmi Pilersuisumi oqartussat attaviginiaraluaratsigit iluatsitsinngitsoorpugut.
